"Apple" komponentlərinin tədarükçüsü "LG Innotek" UPC1 ekrandaxili kamera modulunu təqdim edəcək "iPhone" displeylərini inkişaf etdirməyə başlayıb.

Valyuta.az xəbər verir ki, bu barədə Koreyanın “TheElec” nəşri məlumat yayıb.

Qeyd olunur ki, yeni modul "Apple"a heç bir deşik və kəsiksiz ekranlı "iPhone" yaratmağa imkan verəcək. İnsayder məlumatlarına görə, yeni UPC ön kamerası ənənəvi kameralarla müqayisədə bəzi məhdudiyyətlərə malikdir, xüsusən də displey təbəqəsindən keçdiyi üçün daha az işıq tutur. Bu problemə cavab olaraq, "LG Innotek" kamera sensoruna çatan işığın intensivliyini artıracaq xüsusi linzalar hazırlayır.

Lakin bu yenilik 2024-cü ildə buraxılacaq "iPhone 16" və ya digər gələcək modellərdə görünməyəcək. Ehtimal olunur ki, "Apple" ilk dəfə 2025-ci ildə "iPhone 17 Pro"nu ön kamera üçün yuvarlaq deşik və displeydə olan "Face ID" ilə təqdim edəcək.

Beləliklə, heç bir çentiksiz tam hüquqlu "iPhone" 2026-cı ildə buraxıla biləcək "iPhone 18"dən tez görünməyəcək.
​
Paşa Məmmədli