ABŞ-ın texnologiya nəhənglərindən olan “Apple” Çinin dövlət qurumlarında “iPhone”nun istifadəsinə qadağa qoyulmasından sonra iki gün içərisində 200 milyard dollar itirib.

Valyuta.az xəbər verir ki, Pekinin xarici texnologiyadan asılılığı azaltmaq və kibertəhlükəsizliyi artırmaq planları son vaxtlar sərtləşdirilib. Çin hüdudlarından kənarda həssas məlumat axınını məhdudlaşdırmaq üçün kampaniya aparan hökumət indi “iPhone”lardan istifadəni qadağan edib. Bu vəziyyət ABŞ-ın texnologiya nəhəngi “Apple”ın dəyər itirməsinə səbəb olub. Şirkətin səhmlərinin dəyəri son iki gündə altı faizdən çox ucuzlaşıb.

ABŞ-nin “Wall Street Journal” (WSJ) qəzeti Çində dövlətə bağlı qurum və təşkilatlarda çalışanlara “Apple” şirkətinin “iPhone” model smartfonlarını və digər xarici marka modellərini iş üçün istifadə etməmələri və onları iş yerinə gətirməmələri barədə göstəriş verildiyini iddia edib. Qəzet əsaslandığı mənbələrə istinadən dövlət qulluqçularının son həftələrdə iş yerindəki yığıncaqlarda və mesaj qruplarında bu mövzuda rəhbərlərindən göstərişlər aldığını qeyd edib. Xəbərdə göstərişin nə dərəcədə geniş vüsət almasının bilinmədiyi, hökumətə bağlı bəzi tənzimləyici qurumların əməkdaşlarına da oxşar tapşırıqların verildiyi söylənilib. Bu tədbir Pekin administrasiyasının texnologiyanın xaricdən asılılığını azaltmaq və kibertəhlükəsizliyi artırmaq üçün son səylərinin bir hissəsi hesab olunur. Maraqlıdır ki, bu addımlar ABŞ-nin Çin texnologiya şirkəti “Huawei” və sosial media platforması “TikTok”a tətbiq etdiyi oxşar qadağalardan sonra atılıb. ABŞ və Çin arasındakı gərginliyə baxmayaraq, “Apple” Çində 22 faizlə smartfon satışında ən böyük paya sahibdir. Şirkət öz smartfonlarının əhəmiyyətli bir hissəsini subpodratçılar vasitəsilə Çində istehsal edir və gəlirinin 19 faizini məhz bu ölkənin bazarından qazanır.

“Bank of America” hesab edir ki, Çin “Apple”ın illik “iPhone” satışlarının 50 milyonunu təşkil edir və belə bir qadağa sözügedən şirkətə ildə 5-10 milyona  başa gələ bilər.

Elmir