Qanuna zidd olan hər hansı hərəkət edildikdə, qaydaları pozduqda bəzən insanlar bunu bilmədiklərini, xəbərlərinin olmadığını bildirirlər. Müxtəlif variantlarla bu qanundan xəbərsiz olduqlarını sübut etməyə çalışırlar. Çünki insanlarda belə fikir var ki, qanundan xəbərsizdilərsə, məsuliyyətə cəlb edilməyə bilərlər. Bəs bilməmək məsuliyyətdən azad edirmi?

Bu barədə vəkil Rəşad Əliyev Valyuta.az-a açıqlamasında bildirdi ki, qanunları bilmək konstitusion tələbdir və hər kəs qanunlara əməl etməyə borcludur: "Azərbaycan Respublikası Konstitusiyasınınn 72-ci maddəsi vətəndaşların vəzifələrinin əsasını müəyyən edir. Bu maddənin tələbinə görə dövlət və cəmiyyət qarşısında hər bir şəxs onun hüquq və azadlıqlarından bilavasitə irəli gələn vəzifələr daşıyır. Hər kəsin üzərinə vəzifələr yalnız Azərbaycan Konstitusiyası ilə və ya qanunla qoyula bilər. Hər bir şəxs Azərbaycan Respublikasının Konstitusiyasına və qanunlarına əməl etməli, başqa şəxslərin hüquq və azadlıqlarına hörmət bəsləməli, qanunla müəyyən edilmiş digər vəzifələri yerinə yetirməlidir. Maddənin III hissəsində isə qeyd edilir ki, qanunu bilməmək məsuliyyətdən azad etmir”.

Rəşad Əliyev bildirir ki, siz qanunundan xəbərsiz olsanız, bilməyərək qanunu pozmuş olsanız belə, məsuliyyətə cəlb olunacaqsınız:

“Həmçinin qanun qarşısında bərabərlik prinsipinə əsasən, istər inzibati xəta, istərsə də cinayət törətmiş şəxslər qanun qarşısında bərabərdirlər. İrqindən, milliyyətindən, dinindən, dilindən, cinsindən, mənşəyindən, əmlak vəziyyətindən, qulluq mövqeyindən, əqidəsindən, siyasi partiyalara, həmkarlar ittifaqlarına və digər ictimai birliklərə mənsubiyyətindən və digər hallardan asılı olmayaraq məsuliyyətinə cəlb olunurlar”.

Nuray