Türk lirəsinin ucuzlaşmasının Azərbaycana təsirləri müzakirə olunmaqdadır. Ekspertlər, iqtisadçılar buna müxtəlif tərəflərdən qiymət verirlər. Bəs lirənin dəyər itirməsi Azərbaycanın Türkiyədən  idxalına necə təsir edəcək? 

Valyuta.Az xəbər verir ki, suala iqtisadçı ekspert Rövşən Ağayev aydınlıq gətirib. Bildirib ki, ötən il bu ölkədə 20%-dən artıq inflyasiya qeydə alınıb:   

“Bəzi iqtisadi şərhlərdə bu fikir tez-tez səsləndirilir ki, Türkiyə valyutasının ucuzlaşması Azərbaycan üçün bu ölkədən idxalı da əlverişli edir. Nəzəri olaraq doğru yanaşmadır. Amma bu məqamı da unutmayaq ki, Türkiyədə lirənin dəyərdən düşmə sürəti ilə inflyasiya da az qala paralel sürətlə davam edir. Ötən ilin yekunlarına görə 20%-dən bir qədər yüksək inflyasiya qeydə alındı. Bu ilin 2 ayının nəticələrinə görə, əvvəlki ilin eyni dövrünə nisbətən inflaysiya 16%-ə yaxın olub. Alternativ hesablama mərkəzləri real səviyyənin daha yüksək olduğunu iddia edir”.

R.Ağayev vurğulayıb ki, bununla Türkiyə məhsul və xidmətlərinin rəqabətqabiliyyətliliyi baxımından nominal məzənnə ucuzlaşmasında əldə etdiyi avantajın əhəmiyyətli hissəsini inflyasiyaya qurban verir. Məsələn, lirə nominal olaraq manat qarşısında 15% ucuzlaşıbsa, amma ordakı inflyasiya ilə Azərbaycanın göstəricisindən 12% yüksək olubsa,  bu halda lirənin nominal ucuzlaşmadan avantajı cəmi 3% təşkil edir.

Ekspert hazırda Türkiyənin son dərəcə yüksək inflyasiya təzyiqi altında olduğunu qeyd edib.