"Apollo Funds" "BP"nin boru kəmərlərində 25% pay almaq üçün təxminən 1 milyard dollar ödəyəcək.

Valyuta.Az xəbər verir ki, ABŞ mərkəzli aktivlərin idarə olunması şirkəti olan "Apollo Global" ilə əlaqəli fondlar "BP Pipelines (TANAP)" layihəsində 25 faiz pay almaq üçün təxminən 1 milyard dollar ödəyəcək. 

"Qeyd edək ki, "BP TANAP"  "BP"nin törəmə şirkəti olaraq, TANAPda  "BP"nin 12 faiz payını idarə edən törəmə şirkətidir.

Razılaşmaya əsasən, "Apollo" fondları "BP TANAP" şirkətindəki nəzarətsiz 25 faiz payı təxminən 1 milyard ABŞ dolları müqabilində satın alacaq. Bu əməliyyatdan əldə olunan gəlirlər "BP"nin 20 milyard dollarlıq aktivlərin satış proqramına və digər gəlir mənbələrinə töhfə verəcək.

Bu razılaşma "BP"yə TANAP layihəsindəki maraqlarını kommersiyalaşdırmaq imkanı versə də, şirkət "BP TANAP"ın əsas səhmdarı olaraq qalacaq və bu mühüm boru kəmərində uzunmüddətli kommersiya və strateji maraqlarını, o cümlədən idarəetmə hüquqlarını qoruyacaq. 

Əməliyyatın 2025-ci ilin ikinci rübündə, müvafiq tənzimləyici orqanların və TANAP səhmdarlarının təsdiqindən sonra tamamlanması gözlənilir.

"Avropa üçün strateji əhəmiyyət daşıyan bu enerji infrastrukturunda "Apollo" ilə tərəfdaşlığımızı genişləndirməkdən və dərinləşdirməkdən məmnunuq", – deyə şirkətdən bildirilib. 

Təxminən 1800 km uzunluğunda olan TANAP boru kəməri Türkiyə ərazisindən keçən Cənub Qaz Dəhlizinin (CQD) əsas hissəsidir. CQD, Xəzər dənizinin Azərbaycan sektorundakı "Şahdəniz" yatağından hasil olunan təbii qazı İtaliya və Yunanıstan da daxil olmaqla Avropa bazarlarına nəql edir. 2024-cü ilin noyabr ayında "Apollo" və "BP" CQD-nin son hissəsi olan TAP layihəsində də tərəfdaşlıq barədə əvvəlki razılaşmanı uğurla başa çatdırıblar.

"Biz "BP" ilə strateji məqsədlərə uyğun şəkildə uzunmüddətli kapitalımızla tərəfdaşlıqda böyük potensial görürük. Bu günə qədərki uğurlu əməkdaşlıq bizi məmnun edir" deyə "Apollo"dan bildirilib. 

"Fondlarımızın Avropanın bu kritik infrastruktur layihəsində "BP" ilə tərəfdaşlığını genişləndirmək imkanı bizim üçün dəyərlidir. Bu investisiya "Apollo"nun yüksək keyfiyyətli, genişmiqyaslı infrastruktur imkanlarına töhfə verməyə davam etdiyini göstərir."

Rəhim