“Bank Respublika” Açıq Səhmdar Cəmiyyətinin (ASC) Bərdə filialının əməkdaşı, Bəxtiyar adlı kredit mütəxəssisi dələduzluq əməlinə yol verib.

Valyuta.az xəbər verir ki, o, dələduzluq yolu ilə ayrı-ayrı vətəndaşların 256 500 manat pulunu mənimsəyib.

Gəncə Ağır Cinayətlər Məhkəməsində Cinayət Məcəlləsinin 178.3.2-ci (Dələduzluq – külli miqdarda ziyan vurmaqla törədildikdə) maddəsi ilə mühakimə edilən Bəxtiyara 6 il müddətinə azadlıqdan məhrumetmə cəzası təyin edilib. Hökmdə qeyd edilib ki, cəza 2 il sınaq müddəti olmaqla şərti hesab edilsin. Məhkəmə istintaqı zamanı Bəxtiyar etdiyi əməli maaşının azlığı ilə izah edib. Onun sözlərinə görə, borcu olduğu üçün belə bir addım atmağa məcbur olub.

O, qurban seçdiklərini bankda kampaniya keçirildiyi və pul qoyarlarsa əlavə qazanc əldə edəcəkləri ilə aldadıb. Məsələn, o Elcan adlı şəxsdən əvvəlcə 20 000 manat pul alıb. 10 gün sonra isə həmin məbləği qaytarıb və “əlavə qazanc” kimi də Elcana 1500 manat verib. Bu əməliyyatı bir neçə dəfə həyata keçirən Bəxtiyar hər dəfəsində aldığı məbləği də “əlavə qazancı” da artırıb. Nəhayət, o, iri məbləğlər almağa başlayıb və beləliklə, bir neçə nəfərin toplam olaraq 256 500 manatını ələ keçirib. Bəxtiyarın qurbanları arasında hətta iş yoldaşı da var.

Hüseyn