"Henley Opportunity Index" ali təhsilin investisiya yolu ilə əldə edilən yaşayış icazəsi və ya vətəndaşlıqla birləşdiyi halda, uzun müddətdə sərvətin qorunmasına və artırılmasına necə təsir etdiyini qiymətləndirib.

Valyuta.Az xəbər verir ki, İndeks həmçinin "ən yaxşı miqrasiya istiqamətləri"ni müəyyən edərək, 2025-ci ildə yaşamaq və işləmək üçün dünyanın ən yaxşı ölkələrini sıralayıb.  

"Henley Opportunity Index" investorlar və onların övladları üçün qlobal əlaqələrini genişləndirmək, karyera perspektivlərini, gəlir potensiallarını və iqtisadi hərəkətliliklərini maksimuma çatdırmaq baxımından ən əlverişli yerləri müəyyənləşdirib.  

İndeks ən yaxşı 46 miqrasiya məntəqəsini altı əsas parametr üzrə qiymətləndirib: gəlir potensialı, karyera inkişafı, məşğulluq perspektivləri, təhsil, iqtisadi hərəkətlilik və yaşayış keyfiyyəti. Məlumatlar 2025-ci ilin yanvar və fevral aylarında toplanıb.  

Yaşamaq və işləmək üçün ən yaxşı ilk 5 ölkə:

1. İsveçrə

İsveçrə yüksək gəlir potensialı, karyera inkişafı və iqtisadi hərəkətlilik göstəricilərinə görə birinci yeri tutub. Həmçinin dünyanın ən yaxşı 250 universitetindən yeddisi burada yerləşir.

2. Sinqapur

İkinci yerdə Sinqapur qərarlaşıb. Ölkə dünyanın ən şəffaf iqtisadiyyatlarından biri kimi qiymətləndirilib. Bundan əlavə, müasir təhsil sistemi və dinamik şəhər mühiti ilə seçilir.  

3. ABŞ

Üçüncü yeri ABŞ tutur. Ölkə, daimi yaşayış icazəsinə aparan asanlaşdırılmış yolu təmin edən EB-5 immiqrant investor proqramı ilə diqqət çəkir. Bundan əlavə, prezident Donald Tramp yaxın zamanda 5 milyon dollarlıq sərmayə qarşılığında yaşayış, işləmək hüququ və vətəndaşlığa aparan yolu əhatə edən "qızıl kart" vizasını təklif edib.  

4. Avstraliya

Avstraliya yaxın zamanda istifadəyə verilən Milli İnnovasiya Vizası ilə bu siyahıda dördüncü yerdə qərarlaşıb.  

5. Kanada

Son on ildə miqrantlar üçün ən cəlbedici istiqamətlərdən biri olan Kanada beşinci yerdədir. Lakin ölkə hazırda Vankuver və Toronto kimi şəhərlərdə mənzil bazarındakı qiymət böhranı ilə bağlı narahatlıqlar fonunda miqrasiya siyasətini yenidən nəzərdən keçirir.  

Rəhim