“Amazon” “Alexa”nın yeni versiyası “Alexa+”ı təqdim edib. 

Valyuta.az xəbər verir ki süni intellekt xüsusiyyətləri və böyük dil modelləri ilə təchiz edilmiş “Alexa+” istifadəçilərə daha təbii və fərdiləşdirilmiş bir əlaqə təqdim etməyi hədəfləyir.

“Alexa+” yalnız suallara cavab verməklə kifayətlənmir, həm də gündəlik işlərdə daha aktiv rol oynayır. İstifadəçilər səsli əmr verərək market alış-verişi edə, tədbir dəvətləri göndərə, şəxsi seçimlərini “Alexa”ya öyrədə bilərlər. Süni intellekt dəstəyi ilə sistem, pəhriz vərdişləri, film zövqləri və vacib sənədlərdəki detalları xatırlayaraq daha ağıllı təkliflər verə bilir.

“Alexa+” əvvəlki versiyasından fərqli olaraq, vizual analiz etmə qabiliyyətinə malikdir. Kamera görüntülərini işləyərək, məsələn, ev heyvanınızın çölə çıxıb-çıxmadığını yoxlaya bilir. Bundan əlavə, restoran rezervasiyası etmək, bilet almaq, yemək sifarişi vermək və nəqliyyat sifarişi vermək kimi funksiyaları yerinə yetirə bilir.

Ev avtomatlaşdırmasında isə “Alexa+” ağıllı cihazları daha intuitiv bir şəkildə idarə edir. Məsələn, "üşüyürəm" və ya "işıq çox parlaqdır" kimi ümumi ifadələri anlayaraq otaq temperaturunu tənzimləyir və ya işıqları azaldır. Həmçinin, musiqi və film təcrübəsini də inkişaf etdirir, yalnız məzmunu oynatmaqla kifayətlənmir, həm də ifaçılar və səhnələr haqqında ətraflı məlumat verir və ya müəyyən bir film səhnəsinə birbaşa keçməyə imkan yaradır.

“Amazon” “Alexa+” modelini prime üzvlərinə pulsuz təqdim edərkən, prime üzvü olmayanlar üçün aylıq 19,99 dollar qiymətlə satışa çıxaracaq. İlk olaraq, Echo Show 8, 10, 15 və 21 cihazlarına sahib istifadəçilər mart ayı sonunda erkən giriş əldə edəcəklər.

Sərvanə Rəmixanova