Bəzi şəxslər iş yerində hansısa narazılıq olanda, münasibətlərin dava həddinə gəlməsindən narahat olmurlar. İş mühitində dava yaranandan sonra işdən ayrılmaq qərarı verirlər. Hətta bəzən iş mühitində olan dava ilə bağlı sosial şəbəkələrdə paylaşım etməkdən çəkinmirlər. Bir qisim kadr isə bu halları normal hesab etmir və düşünür ki, ortada bir narazılıq, problem varsa, vaxtında ayrılmaq və münasibətlərin dava həddinə gətirmək lazım deyil. Çünki bu onların karyeralarını zərər vura bilər. Maraqlıdır, işdən dava ilə ayrılmaq bizim karyeramıza necə təsir edir?

“HR Hunter” şirkətinin qurucusu, İnsan Resursları üzrə konsultant İlkin Mirzəzadə Valyuta.az-a açıqlamasında bildirdi ki, işdən dava ilə ayrılmaq çox səhv qərardır: “Yəni karyeranıza mənfi təsir göstərir. Xüsusilə də, bazar mühiti balaca olan ölkələrdə bu kimi hallar kadrlara daha çox təsir edir. Azərbaycan da balaca ölkədir, bazar kiçikdir və demək olar ki, hər kəs bir-birini tanıyır. Ona görə də dava ilə ayrılmaq heç də müsbət hal deyil. Bəli haqqını tələb etmək yaxşıdır, amma qanun çərçivəsində olmalıdır. Dava ilə ayrılmaq həm biznes etikasına ziyandır, həm şəxsin öz imicinə mənfi təsir edir.

Dava ilə ayrılıb körpüləri yandırmayaraq, yəni normal münasibətdə sağollaşmaq daha məntiqli, daha effektivdir. Bu, şəxsin həm imicinə müsbət təsir edəcək, gələcək əmək fəaliyyəti zamanı da onun haqqında mənfi düşüncələrin yaranmamasına səbəb olacaq”.

Ağamehdi