Beynəlxalq Qızıl Xaç və Qızıl Aypara Cəmiyyətləri Federasiyası (IFRC) mərkəzi Avropada rekord daşqınların tezliklə normaya çevrilə biləcəyini bildirib. 

Valyuta.az xəbər verir ki, bu barədə təşkilatın press-relizində deyilir.

"Mərkəzi Avropa son onilliklərin ən pis daşqınlarını yaşayır və bu, tezliklə yeni normala çevrilə bilər", deyə qurumdan bildirilib.

Qeyd olunur ki, IFRC-nin minlərlə könüllüsü zərərçəkənlərə kömək etmək üçün Avstriya, Çexiya, Moldova, Polşa və Rumıniyada gecə-gündüz işləyir.

Təşkilat vurğulayıb ki, Avropada iqlimin sürətlə istiləşməsi səbəbindən belə daşqınlar tarixi deyil, tez-tez, hətta illik olaraq baş verəcək.

Son günlər yağan leysan yağışları və sonrakı daşqınlar Slovakiya, Çexiya, Polşa, Avstriya və Rumıniyaya təsir edib. Güclü yağıntılar çaylarda suyun səviyyəsinin artmasına səbəb olub. O cümlədən, Çexiyada daşqınlar səbəbindən 10,5 min insan təxliyə edilib. Bazar ertəsi, sentyabrın 16-da Çexiyada da yağış yağacağı, gecə saatlarında çaylarda suyun səviyyəsinin pik qalxması gözlənilir.

Paşa Məmmədli