Daxildə emal gömrük prosedurundan istifadə edənlərin sayı 77% artıb.

Ötən il ixrac məqsədilə daxildə emal gömrük proseduru üçün idxal edilən malların dəyərində 2022-ci illə müqayisədə 85% artım müşahidə edilib.

İqtisadiyyat Nazirliyinin şöbə müdirinin müavini İlkin Şamilov bildirib ki, bu prosedurdan istifadə edən şirkətlərin sayında isə 77% artım müşahidə edilib.

Prosedur emal və xidmət sektorunun inkişafının, ixrac fəaliyyətinin genişləndirilməsinin stimullaşdırılması məqsədilə tətbiq olunur. Malların daxildə emal xüsusi gömrük proseduru altında yerləşdirilməsi qaydalarına indiyədək bir sıra dəyişikliklər edilib.

Sahibkarlıq subyektlərinin prosedur üzrə müraciətlərinin təhlili göstərir ki, 2022-ci ilin may ayında təminat tələbinin məcburiliyinin aradan qaldırılmasından sonra prosedurdan daha aktiv istifadə edilməyə başlanılıb.

Eyni zamanda, 2023-cü ilin aprel ayında alqı-satqı müqaviləsi əsasında da prosedurdan istifadə imkanının yaradılmasından sonra yeni müəssisələr prosesə qoşulub.

Bu da öz növbəsində idxal edilən malların dəyərində artıma səbəb olub. Həmçinin, prosedurdan istifadə edən şirkətlərin sayı da artıb.

© RealTv