Yeni bizneslər bazara hansı qiymətlə daxil olmaqla bağlı tərəddüd yaşayırlar. Bəzən deyirlər ki, yenisən, aşağı qiymətlə başlamasan, müştəri tapmaq çətin olacaq. Bir fikir də odur ki, aşağı qiymətlə başlasan, sonra qiymət artımına gedə bilməyəcəksən, elə aşağı qiymət seqmentində məhsul olaraq qalacaqsan. Bəs yeni başladığımızda qiymətlə bağlı necə davranmalıyıq və hansı qiymətlərlə bazara daxil olmalıyıq?

Bu barədə Valyuta.az-a danışan biznes təlimçisi İlham Əfəndiyev bildirib ki, qiymət məsələsi məhsuldan və bazarın hansı inkişaf mərhələsində olmasından, rəqabətin hansı səviyyədə olmasından asılıdır:

“İllərdir istifadə olunan qiymət təyin etmə strategiyaları var. Bunlardan biri qiymətin maya dəyəri əsasında təyin edilməsidir. Yəni, məhsulun maya dəyəri hesablanır və onun üzərinə müəyyən qədər gəlir əlavə olunur. İkinci yanaşma rəqabətə əsasən qiymət qoyulmasıdır ki, qoyulan qiymətlər rəqiblərlə müqayisə olunur. Burada da iki strategiya ola bilər, rəqibdən daha aşağı qiymət və ya rəqibdən daha yuxarı qiymət. Bu da qoyulan sərmayədən və biznesin əhatə dairəsindən asılıdır”.

Təlimçi qiymətin təyin olunmasının başqa formalarından da danışıb: “Üçüncü yanaşma müştəri üzərindən qiymətin təyin olunmasıdır. Müştərilər arasında sorğu keçirib bilmək olar ki, müştəri məhsulu hansı qiymətə almaq istəyir. Dördüncü məsələ odur ki, bazarda əvvəllər olmayan yeni məhsullar bazara girən zaman təyin olunan strategiyadır. Burada da başlanğıcdan məhsulun bazarda analoqu olmadığı üçün onun qiymətinin maksimum təyin etmək olar. Bu dörd strategiyadan birini seçib bazara girmək və məhsulun satışına başlamaq olar”.

Əvəz Həsənov