İnsan resursları bazarında şirkətlər tərəfindən hansı peşə sahiblərinə daha çox məvacib təklif olunur?

Bu mövzu ilə bağlı rəqəmsal marketinq və biznesin inkişafı üzrə menecer Rəqsanə Məmmədova Valyuta.az üçün yazır.

Maliyyə sahəsində idarəçilər - Maliyyə sahəsi deyəndə, adətən sığorta və bank sahəsi nəzərdə tutulur. Bu sahədə idarəçilər çox məhdud saydadılar. Bundan əlavə, idarəçi nüfuzlu, bacarıqlı, təcrübəli şəxs olmalıdır. Bu səbəbdən vakansiya bazarında yüksək maaş təklif edilməsi normaldır. Onu da qeyd edim ki, belə kadrlar adətən, iş elanları saytlarında CV yerləşdirmirlər. 

Kibertəhlükəsizlik mütəxəssisi - Kibertəhlükəsizlik mütəxəssisi gələcək peşələr siyasına daxildir. Son zamanlar kibercinayətkarlığın, kiberhücümların hətta kiberterrorun artması dövlət və özəl qurumlar üçün yeni təhlükələr yaradır. Bu səbəbdən kiber təhlükəsizlik peşəkarlarına tələbat artıb.

Back-end proqramçılar - Dünyada və Azərbaycanda back-end proqramçılara tələb günü-gündən artır. Yeni texnologiyaların inkişafı, internet və mobil telefon istifadəçilərinin sayının artması əmək bazarında proqramçılara tələbatı yüksək səviyyədə saxlamağa davam edir. Məhz bu səbəbdən Azərbaycanda son zamanlar İT və proqramçı sahəsində kursların sayı artır.

Maliyyə direktorları - Peşəkar maliyyə direktorlarına hər zaman ehtiyac var. Çünki onlar həm vergi qanunvericiliyi üzrə biliklərə malik olmalıdırlar, həm də şirkətin maliyyə göstəricilərini düzgün təhlil edib, şirkətin strateji inkişaf planlarının tərtibində iştirak etməlidirlər. Son zamanlar biznesin şəffaflaşdırılması prosesi maliyyəçilərə tələbatı artırıb.

Marketinq mütəxəssisləri - Marketinqin fəaliyyət sahəsi çoxdur. Məsələn, rəqəmsal marketinq, treyd, B2B və s. Amma bunların hamısını birləşdirən amil var. Şirkətin satışlarını artırmaq və brend qurmaq. Biznes isə satış olmadan inkişaf edə bilməz. Əgər marketoloq öz təcrübəsinə əsaslanaraq qısa müddət ərzində satışları artıra bilərsə, şirkət üçün o əvəz olunmaz kadra çevrilir.

UX və Uİ dizaynerlər - UX (User Experience) /Uİ (User Interface) dizayner müasir peşələrdən biri sayılır. Bu peşə sahibləri mobil tətbiqlərin və web saytların dizaynını, istifadəçilər üçün maksimum dərəcədə rahat etməlidirlər. Yəni dizayn istifadəçilərin vərdişlərinin, davranış qaydalarının əsasında yaradılmalıdır. Son illərdə saytların sayı və mobil tətbiqlərin yüklənməsi ölkədə sürətlə artır. Bu səbəbdən şirkətlərdə UXUI dizaynerlərə tələbat çoxdur.

Memarlar - Memarlara tələbat tikinti bazarında olan vəziyyətdən asılıdır. Bu sektor isə Azərbaycanda son 20 ildə yüksək sürətlə inkişaf edir. Yerli və xarici tikinti standartları haqqında biliklərinə sahib olan, layihələndirmə normativlərini bilən, təcrübəli memarların işsiz qalmaq şansları çox azdır.

SƏTƏM mütəxəssisləri – Bu mütəxəssislərin əsas fəaliyyəti şirkətin əməkdaşlarının iş yerində sağlamlığına zərər gətirən faktorları minimuma endirmək, qanunvericiliyin standartlarını tətbiq etmək və ətraf mühitin  zərər verməsi hallarına yol verilməməsidir. Əməyin mühafizəsi, Ətraf Mühitin Mühafizəsi haqqında qanunların tətbiq edilməsi və sərtləşdirilməsi SƏTƏM mütəxəsislərinə tələbatı artırıb.

Nuray