Şadlıq saraylarında fərqli qiymətə menyular görürük. Menyu qiymətləri günü-gündən artmağa davam edir. Belə fikirlər var ki, menyu qiymətləri şişirdilir, əslində, qiymət fərqi olan menyularda keyfiyyət fərqi olmur. Məsələn, 50 manatlıq menyusu ilə 100 manatlıq menyu arasındakı fərq həqiqətən də məbləğ qədər ikiqatdır?

Restorator Mahir Əhmədzadə Valyuta.az-a şadlıq saraylarındakı menyu qiymətlərindən danışdı. Onun sözlərinə görə, bəzən bu qiymətlər şişirdilir: “Bəzən şişirdilmiş qiymətlər olur. İnteryerinə daha çox pul xərclənən obyektlər olur. Onlar çəkilən xərci hesablayıb, satış qiymətinin üstünə qoyurlar. Bu, düzgün deyil. Ona görə də, haqlı olaraq insanlar narazılıq edir. Qiymətlər real olmalıdır”.

Mahir Əhmədzadə deyir ki, qiymətlər menyuda işlədilən ərzaqların keyfiyyətinə görə də yüksələ bilər. O, əlavə edir ki, belə qiymətlər çox vaxt real olur: "50 manatlıq menyunun öz ərzaq xərcləri var. Məsələn, 15 manatlıq qoyun əti də var, 18 manatlıq Ağcabədidən, Beyləqandan gələn yerli quzu əti də var. Qiyməti baha edən 18 manatlığı alır. Hər bir halda, 100 manatlıq menyu ilə 50 manatlıq menyunun ərzaq keyfiyyətində fərq var. Məsələn, 100 manatlıq menyuda nərə balığı var, amma 50 manatlıq menyuda adi dondurulmuş balıq olur. Sadəcə orada keyfiyyət rol oynayır. Menyunun tərkibində verilən ərzaqların, içkilərin qiymət fərqi rol oynayır. 50 manatlıq menyuda yerli içkilərə önəm verilirsə, 100 manatlıqda xarici içkilər olacaq”.

Nuray