İxracın və İnvestisiyaların Təşviqi Agentliyinin (AZPROMO) yaydığı məlumata görə, bu ilin yanvar-sentyabr aylarında Azərbaycan 2 milyard 434,32 milyon ABŞ dolları dəyərində qeyri-neft məhsulları ixrac edib. Bu da ötən ilin anoloji dövrü ilə müqayisədə 10,6 faiz çoxdur. 

Valyuta.az-a açıqlama verən İqtisadi və Sosial İnkişaf Mərkəzinin rəhbəri Rəşad Həsənovun fikrincə, son dövrlərdə qeyri-neft sektoru üzrə ixracın artımı daha çox sənaye, xüsusən də neft-kimya məhsulları, elektrik enerjisi və mədən sənayesi hesabına əldə edilir: 

“Cari ildə ixracda baş verən bu artım tempi də eyni tendensiyanın nəticəsidir. Xüsusilə də yeni yaradılan sənaye parklarında istehsal olunan məhsullar, polietilen, poliprofilen, bitum məhsulları qeyri-neft adı altında rəsmləşdirilən ixracın həcminin artmasına gətirib çıxarır. Ümumiyyətlə, iqtisadiyyatın şaxələndirilməsi iki istiqamətli ola bilər. Biri üfüqi şaxələndirmədir ki, burada fərqli sektorlar üzrə inkişafın təmin edilməsi nəzərdə tutulur. Digər tərəfdən, bəzən şaquli şaxələndirmədən də istifadə edilir. Burada da eyni sektor üzərində, amma artıq daha çeşidləndirilmiş, fərqli sənaye emal mərhələlərinə keçmiş məhsulların istehsalı nəzərdə tutulur. Paralel olaraq, kənd təsərrüfatı məhsullarının ixrac üzrə çəkisinin azalmasını müşahidə edirik. Çünki ixracın həcminin artım tempilə kənd təsərrüfatı məhsullarının ixracının artım tempi uzlaşmır”. 

Ramiz