Siyəzən Rayon İcra Hakimiyyəti mənzil fondunun əsaslı təmiri ilə bağlı elan etdiyi tenderə yekun vurub

Valyuta.az xəbər verir ki, tenderin qalibi “Dəvəçi Tikinti” MMC olub. İcra Hakimiyyəti ilə MMC arasında bağlanan satınalma müqaviləsinin maliyyə dəyəri 68.972,89 AZN-dir. 

Müqaviləyə əsasən, Siyəzən rayonunda qəzalı vəziyyətdə olan binalarda təmir işləri aparılacaq. 

İqtisadiyyat Nazirliyi yanında Dövlət Vergi Xidmətinin reyestr məlumatlarına əsasən, “Dəvəçi Tikinti” MMC 17 mart 2009-cu ildə qeydiyyata alınıb. Nizamnamə kapitalı 10 AZN olan şirkəti hüquqi ünvanı Şabran rayonu, Şabran şəhəri, M.Ə.Rəsulzadə küçəsində yerləşir. MMC-nin qanuni təmsilçisi Mütəllimov Akif Üzüməli oğludur.

Açıq mənbələrdə “Dəvəçi Tikinti” MMC və şirkətin qanuni təmsilçisi Akif Mütəllimov barədə hər hansı bilgi yoxdur. 

Dövlət Satınalmalarının vahid elektron portalında qeyd olunan məlumatlara görə, şirkət sonuncu dəfə 2021-ci ildə Şabran Rayon İcra Hakimiyyətinin elan etdiyi 3 tenderin qalibi olub. 2022-ci ildə isə heç bir tenderin qalibi olmayıb. 

Açıq mənbələrdə 12 ildir faəliyyət göstərən şirkət barədə məlumat məhdudluğu şübhəli məqamlardan xəbər verir. İstisna deyil ki, şirkət qeyri-şəffaf tenderlərdə iştirakı üçün yaradılıb.

Davud