Ötən həftədən etibarən, Azərbaycanda nisyə mal alqı-satqısı ilə məşğul olanlarla bağlı yeni cərimələr müəyyənləşib. İnzibati Xətalar Məcəlləsinə (İXM) edilən dəyişikliyə əsasən, kredit tarixçələrini təşkil edən məlumatın kredit bürosuna müəyyən olunmuş qaydada, yaxud tam, düzgün və ya vaxtında təqdim edilməməsinə görə vəzifəli şəxslər 1 500 manatdan 2 000 manatadək məbləğdə, hüquqi şəxslər 10 000 manatdan 12 000 manatadək cərimə ediləcəklər.

Valyuta.az-a açıqlama verən iqtisadçı ekspert Natiq Cəfərlinin fikrincə, bu istiqamətdə təyin edilən yeni cərimələr regionlarda müəyyən problemlər yaradacaq: 

“Nisyə mal adətən alıcı ilə satıcı arasında olan məsələdir. Ona görə də ikisindən biri şikayət etməlidir ki, mövcud vəziyyətdə məsələ ilə bağlı araşdırma aparılsın. Regionlarda, rayon yerlərində adətən insanlar bir-birini tanıyır. Ona görə də müəyyən məhsul və malları bəzi hallarda nisyə alırlar. Belə olan halda prosesə dövlətin birbaşa formada müdaxilə etməsini anlamıram. Qanunda cərimələr deyil, prosesin rəsmiləşdirmə növləri müzakirə olunub qəbul olunsaydı, daha yaxşı olardı. Məsələn, şahidlərin iştirakı ilə notarial qaydada imzalamaq. Qərar Bakı şəhərində geniş əks-səda doğurmayacaq. 

Regionlar üzrə isə qərar müəyyən problemlər yaradacaq. Çünki bir-birilərini tanıyanlar bəzi hallarda malı nisyə verməklə bir-birinə kömək edir. Həmin hərəkətin də ticari dövriyyəyə böyük ziyanı olmur. Yəqin ki, gələcəkdə prosesin işləmə mexanizmlərilə bağlı yeni düzəlişlər də qəbul olunacaq”. 

Həmsöhbətimizə görə, atılan addım regionlarda nisyə alış-verişin müəyyən dərəcədə azalmasına rəvac verəcək:

“Nəticədə ticarət dövriyyəsində müəyyən azalmalar da ola bilər”. 

Ramiz