2023-cü ilin ilk yarısında Azərbaycanda vaxtı ötmüş kreditləri ən çox artan banklar arasında “Azərbaycan Beynəlxalq Bankı” (ABB) da yer alıb. 

Valyuta.az-ın məlumatına görə, sözügedən bankın problemli kreditləri ilin əvvəli ilə müqayisədə 2023-cü ilin iyulun 1-nə 2,2 dəfə və ya 316,4 milyon manat artaraq 587,03 milyon manata yüksəlib. İlin əvvəlində bu rəqəm 270,6 milyon manata bərabər olub. 

Bu isə bankın vaxtı ötmüş kreditlərinin ümumi portfeldə çəkisinin 7,7%-dən 14%-ə kimi artmasına təsir edib. 

ABB-nin vaxtı keçmiş kreditlərində ən böyük artım biznes kreditləri üzrə müşahidə edilir. Bankın problemli biznes kreditləri 250,5 milyon manat artaraq 29,03 milyon manatdan 279,5 milyon manata kimi yüksəlib. Son altı ayda problemli istehlak kreditləri isə 134,8 milyon manatdan 175,1 milyon manata kimi artıb. Daşınmaz əmlak kreditlərində isə bu rəqəm 132,5 milyon manat təşkil edib. Bu isə ilin əvvəlinə nisbətən 24% və ya 25,6 milyon manat çoxdur. 

Bankın ümidsiz kreditləri, yəni vaxtı bir ildən artıq ötmüş kreditləri isə 70,3 milyon manatdan 77,7 milyon manata kimi yüksəlib. Son altı ayda ümidsiz kreditlər 10,5% və ya 7,4 milyon manat artıb.

Mahir