“Bir çox inkişaf etmiş dünya ölkələrində vəziyyət belədir ki, şəxs təqaüd yaşına çatmazdan öncə vəfat etdikdə, pensiya kapitalı onun ailə üzvləri (yaxın qohumları) arasında bölüşdürülür. Həmçinin o ölkələrdə belə hal da mövcuddur ki, insanlar yığılan kapitalı pensiya yaşına çatmamış da götürüb, hansısa bir tələbatını ödəmək məqsədilə xərcləyə bilər. Təəssüf ki, Azərbaycanda bu qaydalar yoxdur. Çünki Dövlət Sosial Müdafiə Fondu hələ dövlət büdcəsinin dotasiyasından asılıdır”.

Valyuta.Az xəbər verir ki, bu fikirləri publika.az-a açıqlamasında iqtisadçı Pərviz Heydərov bildirib.

Ekspert ölkəmizdə pensiya sistemində varislik hüququnun olmamasından və bu halın yığılan kapitalın sonrakı aqibətinə təsirindən də bəhs edib:

”Azərbaycanda yığılan kapitalın (red – minimal pensiya kapitalını nəzərdə tutur) sərfiyyatı pensiyaya çıxdıqdan sonrakı 12 il üçün nəzərdə tutulur. Yəni bir insanın 12-ci ildən sonrakı pensiyası digər şəxslərin kapitalı hesabına təmin olunur. Bu o deməkdir ki, bir şəxs pensiya yaşına çatmamış vəfat etdikdə, onun yığılmış pensiya kapitalı öz ailə üzvlərinin və ya digər yaxın qohumlarının təminatı üçün istifadə olunmur, dövlətin hesabına keçir”.

P.Heydərov onu da vurğulayıb ki, ölkəmizdə 2019-cu ildən etibarən DSMF-nin tədricən dövlət büdcəsindən asılılığının azaldılmasına başlanılıb, bu istiqamətdə vacib addımlar atılır. Hazırda qanunvericiliyə dəyişikliklər hazırlanır ki, Dövlət Sosial Müdafiə Fondunun sərbəst vəsaitlərini investisiya məqsədləri üçün də istifadə etmək mümkün olsun. O cümlədən minimal pensiya kapitalından sonradan ailə üzvlərinin yararlana bilməsi ilə bağlı mexanizm hazırlanır.

İqtisadçı əlavə edib ki, özəl pensiya fondlarının yaradılması və DSMF-nin vəsaitlərinin yeni mənbələr hesabına artması sözügedən problemdən ən yaxşı çıxış yolu ola bilər.