Alyaska Hava Yollarına məxsus "Boeing 737 MAX 9" uçuşun 20-ci dəqiqəsində füzelyajın bir hissəsini itirdikdən sonra ABŞ-nin Oreqon ştatının Portlend şəhərində məcburi eniş etməli olub.

Buna səbəb təyyarə havaya qalxandan az sonra lyukunun boşalması olub. Ekipaj göyərtədəkilərə təzyiq problemi ilə bağlı xəbərdarlıq edib və eniş etməyə başlayıb. Uçuş zamanı təyyarənin göyərtəsində 171 sərnişin və 6 ekipaj üzvü olub, heç kim xəsarət almayıb

Hadisə baş verəndən sonra Avropa Aviasiya Təhlükəsizliyi Agentliyi bu tipli təyyarələrin istismarının dayandırılması barədə göstəriş verib.

Daha sonra Türk Hava Yollarına aid 5 "Boeing 737 MAX 9" təyyarəsi də yoxlamaya cəlb olunub. Texniki araşdırmalar tamamlanana qədər Türk Hava Yolları bu 5 təyyarəni endikləri ilk hava limanında istifadədən çıxarıb. 

Həmçinin ABŞ-da da təhlükəsizlik yoxlamaları məqsəsilə 171 "Boeing 737 MAX 9" təyyarəsinin uçuşlarını dayandırıb.

Bəs Azərbaycan Hava Yolları (AZAL) öz uçuşları zamanı bu təyyarələrdən istifadə edirmi?

Bununla bağlı Valyuta.az-a açıqlama verən "Azərbaycan Hava Yolları" QSC-nin mətbuat xidmətinin rəhbəri Fərid Hüseynov bildirib ki, qurumun istismarında adıçəkilən təyyarələrdən yoxdur. 

Fərid Hüseynov əlavə edib ki, AZAL-ın təyyarə parkına hazırda "Airbus", "Boeing" və "Embraer" şirkətlərinə aid 29 təyyarə daxildir. 

Davud