Elmi adı "Allodiplogaster sudhausi" olan bir soxulcan növünün qida mənbələrinin azalması səbəbindən stresə məruz qaldıqda ətrafındakı öz növünə aid olan canlıları yediyi müəyyənləşib. 

Valyuta.az xəbər verir ki, Almaniyanın Maks Plank İnkişaf Biologiyası İnstitutu, ABŞ-ın İndiana Universiteti və Yaponiyadakı Meşə və Meşə Məhsulları Araşdırma İnstitutunun tədqiqatçıları bu kiçik canlıları ətraflı şəkildə araşdıraraq, onların nəhəng ağızlarının olduğunu müəyyən ediblər. Araşdırmaçılar bu qurdlarda nəhəng ağızların inkişafının stresə cavab ola biləcəyini düşünür.

"Nematodlar" (yaxud dəyirmi qurdlar) adlanan bu cür canlı qruplarında müəyyən qidaları yedikdə ikinci ağızlarının göründüyü bilinirdi. Ancaq tək, özü də nəhəng bir ağız görmək tədqiqatçılar üçün sürpriz olub. Araşdırmada bu qurdcuqlara bakteriya və göbələklərdən ibarət qidalar verilib. Təcrübələr zamanı yetkin qurdlarda üç fərqli ağız formasının meydana gəldiyi, bu transformasiya qabiliyyətinin canlıların bütün genomunun ikinci bir surətinə sahib olmasına bağlılığı müəyyənləşib. "Bütün genin surəti" adlanan bu proses nematodlara özlərini dəyişdirmək üçün əlavə çeviklik verir. Digər tərəfdən, qurdların necə və niyə "Yamyam" rejiminə girdiyini anlamaq üçün daha çox araşdırmaya ehtiyac duyulur. 

Qida qıt olduqda bu qurdların ətrafındakıları fərq etmədən yediyi bildirilir.

Elmir