Azərbaycanda istehsal prosesinin 90-95 faizi hələ də Bakı və Abşeron yarımadasında cəmlənib. Bu xüsusda bölgələrin inkişafı, onların istehsal prosesində çəkisinin artırılmasına nail olmaq üçün bir sıra addımlar atılsa da, görünən odur ki, həmin addımlar hələlik real effekt vermir. 

Hazırda Azərbaycan azad edilmiş ərazilərimizin bərpasını həyata keçirir. Azad edilmiş rayonlarda müəyyən iqtisadi infrastrukturun yaradılması da gözlənilir. Bu mənada görəsən, gələcək perspektivdə Qarabağ İqtisadi Zonası istehsal prosesində Bakının çəkisinin azalmasına nail ola bilərmi?

Valyuta.az-a açıqlamasında Liberal İqtisadçılar Mərkəzinin rəhbəri Akif Nəsirli bildirib ki, Qarabağ İqtisadi Zonasında görülən işlər səmərəli olarsa, həmin zona paytaxtın ölkə üzrə istehsal prosesindəki çəkisinin 20 faizə qədər azalmasına səbəb ola bilər:

“Bu hazırda Qarabağ İqtisadi Zonasında görülən işlərin səmərəsi və effektivliyindən asılı olacaq. Qarabağ İqtisadi Zonasında iqtisadi mərkəzin yaradılması həm Bakının iqtisadi, həm də miqrasiya yükünü bir qədər azalda bilər. Səmərəlilikdən asılı olaraq Qarabağ İqtisadi Zonası Bakının istehsal prosesindəki yüksək çəkisinin 10-20 faizə qədər azalmasına təkan verə bilər. Amma hazırda mövcud olan iqtisadi disbalansı yalnız azad edilmiş ərazilərimiz hesabına tam aradan qaldırmaq da mümkün deyil. Bu gün Azərbaycanın dövlət büdcəsinin 95, ixracatının 90 faizi Bakı və Abşeron rayonunun payına düşür. Bu disbalansı 50 faizə qədər endirmək üçün Qarabağla yanaşı, daha bir neçə bu kimi azad iqtisadi zonalar yaradılmalıdır”.

Ramiz