ChatGPT və digər süni intellektlə işləyən chatbotlar insanların gündəlik həyatının ayrılmaz hissəsinə çevrilməkdədir. İndi isə Windows platforması üçün ChatGPT tətbiqinin hamı üçün əlçatan olması bu tendensiyanı daha da gücləndirəcək.

Valyuta.az "Trend"ə istinadən xəbər verir ki, əvvəllər bu xidmət yalnız pullu abunəçilər üçün mövcud idi. İstifadəçilər indi Microsoft Mağazasından ChatGPT tətbiqini yükləyə bilərlər.

Windows üçün ChatGPT tətbiqi funksionallıq baxımından Android versiyasına bənzəsə də, masaüstü interfeys daha böyük mətnlərin daxil edilməsini və şəkillərin əlavə edilməsini asanlaşdırır. Tətbiq çat vasitəsilə ünsiyyətə və səsli əmrlərə dəstək verir. Bununla belə, pulsuz istifadəçilər üçün məhdudiyyətlər davam edir: istifadəçilər bir neçə dəqiqə ərzində ayrılmış limiti doldura bilərlər.

Premium istifadəçilər (aylıq 20 dollar və ya daha çox ödəyənlər) üçün isə Windows versiyası xüsusilə faydalıdır. Masaüstü versiya veb versiya ilə eyni funksionallığı təklif edir, lakin ayrıca pəncərədə işləmə imkanı chatbotla qarşılıqlı əlaqəni daha rahat və iş axınlarını daha effektiv edir.