"OpenAI"nin aparıcı təhlükəsizlik tədqiqatçılarından biri olan Lilian Veng cümə günü şirkətdən ayrılacağını elan edib.

Veng avqust ayından bəri "OpenAI"də tədqiqat və təhlükəsizlik üzrə vitse-prezident vəzifəsində çalışırdı və ondan əvvəl şirkətin təhlükəsizlik sistemləri qrupunun rəhbəri idi.

Valyuta.Az-ın verdiyi məlumata əsasən, Veng "X" sosial platformasında paylaşdığı yazıda, “"OpenAI"də keçirdiyim 7 ildən sonra artıq yenidən başlamağa və yeni bir istiqaməti kəşf etməyə hazıram,” deyə bildirib. O, son iş gününün 15 noyabr olacağını qeyd edib, lakin növbəti addımları barədə açıqlama verməyib.

“"OpenAI"dən ayrılmaqla bağlı son dərəcə çətin qərar verdim,” deyə Veng yazıb. “Əldə etdiyimiz uğurlara nəzər salanda Təhlükəsizlik Sistemləri komandasında hər kəsə görə çox qürur duyuram və bu komandanın uğurla irəliləyəcəyinə yüksək inamım var.”

Veng-in gedişi, son bir ildə "OpenAI"dən ayrılan süni intellekt təhlükəsizliyi və siyasəti üzrə tədqiqatçılar, həmçinin digər rəhbər işçilərin növbəti ayrılışıdır. Bir neçə keçmiş əməkdaş "OpenAI"ni kommersiya məhsullarını süni intellekt təhlükəsizliyindən üstün tutmaqda ittiham edib. Veng, bu il "OpenAI"dən ayrılaraq başqa yerlərdə süni intellekt təhlükəsizliyi üzərində işləyən, ləğv edilmiş "Superalignment" komandasının liderləri İlya "Sutskever" və "Yan Leyke"ə qoşulur.

Veng "OpenAI"yə ilk dəfə 2018-ci ildə qoşulub və "LinkedIn"dəki profilinə əsasən, şirkətin Rubik kubunu həll edə bilən robot əlini hazırlayan robotika qrupunda çalışıb. Onun dediyinə görə, bu tapşırığı yerinə yetirmək iki il çəkib.

"OpenAI" "GPT" modelinə daha çox diqqət yetirməyə başladıqda, Veng də bu istiqamətə keçib. O, 2021-ci ildə startapın tətbiqi süni intellekt araşdırmaları qrupunun yaradılmasına kömək edib. "GPT-4"ün istifadəyə verilməsindən sonra, Veng 2023-cü ildə startap üçün təhlükəsizlik sistemləri qrupunu qurmaqla vəzifələndirilib. Bu gün "OpenAI"nin təhlükəsizlik sistemləri bölməsində 80-dən çox alim, tədqiqatçı və siyasət eksperti çalışır.

Bu qədər süni intellekt təhlükəsizliyi üzrə mütəxəssisin olmasına baxmayaraq, "OpenAI"nin təhlükəsizliyə diqqətinin yetərli olub-olmaması ilə bağlı narahatlıqlar qalmaqdadır. Uzun müddət siyasət tədqiqatçısı olan Mayls Brandege oktyabr ayında şirkətdən ayrılıb və "OpenAI"nin onun məsləhətçi olduğu AGI hazırlığı qrupunu ləğv etdiyini elan edib. Eyni gün “New York Times” keçmiş "OpenAI" tədqiqatçısı Suçir Balajini dərc edib:- "Balaji şirkətin texnologiyasının cəmiyyətə faydadan çox zərər gətirəcəyini düşündüyü üçün "OpenAI"dən ayrıldığını bildirib."

"OpenAI" "TechCrunch"a bildirilib ki, Veng-in yerinə keçəcək namizədlər üçün keçid prosesi üzərində çalışırlar.

“Lilian-ın təhlükəsizlik sahəsində apardığı tədqiqatlara və ciddi texniki təhlükəsizlik tədbirlərinin qurulmasına verdiyi töhfələrinə görə ona dərin minnətdarlığımızı bildiririk," deyə "OpenAI"nin sözçüsü əlavə edib. “Təhlükəsizlik Sistemləri komandamızın qlobal səviyyədə yüz milyonlarla insana xidmət göstərən sistemlərimizin təhlükəsiz və etibarlı olmasını təmin etməkdə vacib rolunu davam etdirəcəyinə əminik.”

Qeyd edək ki, son aylarda "OpenAI"dən ayrılan digər rəhbərlər arasında texnologiya üzrə direktor Mira Murati, baş tədqiqat direktoru Bob MakQryu və tədqiqat üzrə vitse-prezident Barret Zof da var. Avqust ayında tanınmış tədqiqatçı Andrej Karpaty və təsisçi Con Şulman da şirkətdən ayrılacaqlarını elan ediblər. Bu şəxslərin bəziləri, o cümlədən Leyke və Şulman, "OpenAI"nin rəqibi olan "Anthropic"ə qoşulub, digərləri isə öz təşəbbüslərini başlatmaq üçün ayrılıblar.

Rəhim