“Sizin internetə bir qoşulan sevinir, bir də müqaviləyə xitam verən”, “İnternet çox zəifdir. Demək olar ki, yoxdur”, “Qardaş, sizin internetiniz ölüb, qaldıranı yoxdur”, “Havayı pul gedir, internet də yox dərəcəsində”. Bunlar “Baktelecom”un “Facebook” səhifəsində yazılan şikayət rəylərindən bir neçəsidir. “Baktelecom”un internetinin zəifliyindən şikayətlənənlər çoxdur.

Şikayətlərin səbəbinin nə olması ilə bağlı “Baktelecom”la əlaqə saxladıq. Şirkətdən valyuta.az-a bildirildi ki, şəbəkə daim nəzəratdə saxlanılır: “İnternet xidmətinin təminatı istiqamətində tərəfimizdən kütləvi nasazlıq müşahidə olunmur. Hər hansı dəyişiklik qeydə alınarsa, yaxud müraciət daxil olarsa, mütəxəssislər mövcud vəziyyətin araşdırılması istiqamətində işə başlayırlar. Fərdi ev təsərrüfatlarında texniki nasazlığın baş verməsi mümkündür. Belə hallarda da abunəçilərin müraciəti əsasında internet xidmətində yaranan texniki nasazlıqlar nəzarətə götürülərək aradan qaldırılır. Texniki problemlərlə qarşılaşdıqları halda abunəçilərin “170” Çağrı Mərkəzinə müraciət etmələri xahiş olunur”.

“Baktelecom” istifadəçisi Orxan Ömərli valyuta.az-a bildirdi ki, Çağrı Mərkəzinin qəbuluna düşmək çətin məsələdir: “Nə zaman zəng edirsən, deyir ki, növbədə 30 nəfər var. 5 manat konturum bitdi, amma şikayətimi bildirmək üçün mənə növbə çatmadı”.

Fidan Şirinzadə də internetin zəifliyindən gileylənir: “ATS-ə zəng edirəm, deyir, modemi söndürüb-yandırın düzələcək, axşamlar modemi söndürün. Mən anlaya bilmirəm ki, modemi söndürüb yandıranda internetin zəifliyi düzəlir?”

Təkcə Fidana yox, bu sual hər kəsə maraqlıdır. Çünki bu ifadəni tez-tez eşidirik. Bəs nə qədər doğru anlayışdır?

İT mütəxəssis Elvin Abbasov valyuta.az-a bu mif barədə danışdı: “Modemin illərlə işlək vəziyyətdə olması yaxşı deyil. Modem də hər bir elektronik avadanlıq kimi müəyyən dövrdə söndürülməlidir, amma modemi söndürüb-yandırmaqla internetin zəifliyinin aradan qalxması səhv anlayışdır. İnternetin zəifliyi bir neçə alt motivə söykənir. Ya provayderdə, ya modemdə, ya da hansısa avadanlıqda problem var. Bu problemlərdən çıxış yolu da söndürüb-yandırmaq olmur. Avadanlıq dəyişməli, yaxud təmir edilməlidir”.

E.Abbasov deyir ki, internet çəkdirən zaman evdəki istifadəçi sayı nəzərə alınmalıdır: “İnternet paketi çəkdirəndə, evdə nə qədər internet istifadəçisi olduğuna baxmaq lazımdır. İstifadəçi sayına uyğun internet paketi alınmalıdır. Bəzən evdə 3-5 nəfər yaşayır və onların hamısı internetdən eyni vaxtda istifadə edir, bu halda aşağı həcmli paket almısınızsa, internetdə problemlər yaranacaq”.

İT mütəxəssisi modem seçiminin də düzgün edilməsinin vacib olduğunu bildirdi: “Azərbaycanda təəssüf ki, ən keyfiyyətsiz modemlər istifadə olunur. Vətəndaşlar internet çəkdirərkən internetin paketi ilə yanaşı, modem seçimini də düzgün etməlidirlər”.

“Baktelecom” açıqlamasında irimiqyaslı infrastruktur layihələri həyata keçirildiyini, ötən illə müqayisədə şirkətin təklif etdiyi internetin sürətində artım olduğunu da bildirdi: “Aparılan işlərin məntiqi nəticəsi olaraq ölkədə genişzolaqlı internetin sürəti ilə bağlı beynəlxalq hesabatlarda əvvəlki aylarda olduğu kimi müsbət dinamika davam edir. “Ookla” şirkəti tərəfindən iyul ayında dərc edilən ən son hesabatda ötən ilin müvafiq dövrü ilə müqayisədə sürətin 20.91 Mbit/s-dən 29.14 Mbit/s-ə dəyişdiyi qeyd olunur“.

Nuray