Rəsmi işindən çıxıb “Bloger”, “Youtuber” olanlara, onlayn mağaza açıb alış-verişə yönələnlərə zaman keçdikcə daha çox rast gəlirik. Çox zaman həmin şəxslərə ailələri, yaxınları tərəfindən bu işin gələcəyinin olmadığı deyilir, ənənəvi işlərlə məşğul olmaq tövsiyə edilir. Lakin bu sahə günü-gündən genişlənir, bu sektordan böyük gəlirlər qazananlar var. Karyera cəhətdən yanaşsaq, hansına üstünlük verməliyik?

“HR Hunter” şirkətinin qurucusu, İnsan Resursları üzrə konsultant İlkin Mirzəzadə valyuta.az-a açıqlamasında bildirdi ki, online bizneslərə tələb çoxdur və getdikcə də artacaq: “Dünyada texnologiyaya, onlayn sistemlərə maraq artır. Onlayn sistemlərin gücü daha qabarıq hiss olunur. Ümumiyyətlə, “Youtuber”, “Bloger” və s. kimi fəaliyyətlərlə məşğul olan şəxslər ölkə xaricində 100 minlərlə, milyonlarla pul qazana bilir. Sadəcə bu bazarın ölkəmizdə nisbətən zəifliyi, ölkə əhalisinin az olması bu kimi işlərdən yüksək gəlir qazanmağa imkan vermir, yaxud müəyyən həddə qədər qazanmaq mümkün olur”.

İ.Mirzəzadə qeyd etdi ki, əvvəlki nəsil onlayn sektorda işlərdə çalışmadıqları, bu işləri görmədikləri üçün bu sahələri perspektivsiz kimi qiymətləndirirlər: “Bu işlə məşğul olan kimsə uğurlu olmayanda, deyirlər ki, görürsən, bu işlər dayanıqlı deyil, qısamüddətlidir və s. Lakin pandemiya bizə bunun əksini sübut etdi. Kimin biznesi həm onlaynda, həm offlaynda var idisə, onlayn satış proseslərini əvvəlcədən təşkil etmişdilərsə, onlar bu proseslərdən daha asanlıqla xilas ola bildilər. Onlaynda olmayan bizneslər isə bu proseslərdən çıxmağa çətinlik çəkdilər. Ümumiyyətlə, onlayn bizneslərə tələb hər zaman artıb və artacaq. Texnologiyalar inkişaf etdikcə bu sektora tələbat olduqca artacaq, demək olar bütün bizneslərin onlaynda olması zərurəti yaranacaq”.

Qarakişi Vəlizadə