Bu ilin I rübündə Xəzərin Azərbaycan sektorunda yerləşən "Şahdəniz" qaz-kondensat yatağından təqribən 5,1 mlrd. kubmetr qaz hasil edilib ki, bu da illik müqayisədə 8,5% çoxdur.

Valyuta.az  xəbər verir ki, bu barədə BP-nin (layihənin operatoru) Azərbaycanda apardığı əməliyyatlar üzrə 2021-ci ilin I rübünün yekunlarına dair dərc etdiyi hesabatda qeyd edilib.

Hesabat dövründə yataqda 1 mln. ton (7,8 mln. barel) kondensat hasil edilib ki, bu da ötən ilin müvafiq dövrünün göstəricisinə bərabərdir.

Məlumata əsasən, hasilat "Şahdəniz Alfa" və "Şahdəniz Bravo" platformalarından aparılıb.

İlin birinci rübündə "Şahdəniz" üzrə fəaliyyətlərə 688 mln. ABŞ dolları yaxın əməliyyat xərcləri və 181 mln. dollar əsaslı xərclər çəkilib. Əsaslı xərclərin böyük əksəriyyəti "Şahdəniz-2" layihəsinə aid olub.

Qeyd edək ki, "Şahdəniz" yatağı üzrə pay bölgüsü haqqında saziş 1996-cı ildə imzalanıb və ratifikasiya edilib. Layihədə BP (operator – 28,8%), AzSD (10%), "SGC Upstream" (6,7%), "Petronas" (15,5%), "Lukoil" (10%), NICO (10%) və TPAO (19%) şirkətləri iştirak edir.