“İnsanların gəlirləri artdıqca xərclərin strukturunda ərzaq payı getdikcə aşağı düşür”.

Bunu Valyuta.az-a açıqlamasında iqtisadçı ekspert Xalid Kərimli əhalinin ay ərzində xərclərini daha çox hansı istiqamətə yönəltməsindən danışarkən deyib. Ekspert dünya praktikasında da əhalinin xərclərinin 55-56%-inin ərzaq məhsulları təşkil etdiyini vurğulayıb:

“Əhalinin sosial vəziyyətinə baxanda ən yaxşı statistikalardan biri budur. Çünki ümumi şəkildə vəziyyəti daha yaxşı izah edir. Düzdür, bizim statistikaya arxayın olmaq olmaz, qeyri-rəsmi iqtisadiyyat da var. Rəsmi statistikanın məlumatlarına görə, ümumi iqtisadiyyat haqqında fikir söyləmək bir qədər çətindir. Amma ümumi dinamika istiqaməti göstərir. Bu statistika deyir ki, Azərbaycanda əhalinin xərci daha çox ərzaq məhsullarına gedir. Bu da əhalinin sosial vəziyyətinin yaxşı olmadığına dəlalət edir”. 

Ekspert az inkişaf etmiş ölkələrdə ərzaq xərclərinin 60-70%-ədək artmasını əlavə edib:

“Bu nə deməkdir? İnsan birinci əlinə dəyən pulu ərzaq məhsullarına, sonra isə digər istiqamətlərə xərcləyir. Gəlirlər çoxaldıqca xərclər də artır. Ərzaq məhsullarının limiti var. İnsanların gəliri artdıqca ərzaq xərcləri çox artmır, amma əvəzində gəzintiyə, geyimə, digər turizm sahələrinə pul xərcləyirlər”.

Qeyd edək ki, Dövlət Statistika Komitəsindən verilən məlumata görə, 2023-cü ilin yanvar-fevral ayları ilə müqayisədə pərakəndə ticarət dövriyyəsi real ifadədə 3,5 faiz, o cümlədən ərzaq məhsulları, içkilər və tütün məmulatları üzrə 2,1 faiz, qeyri-ərzaq malları üzrə 5,2 faiz artıb.

Aylin