“Hansı fermerin əkdiyi soğanlar anbarlarda çürüməyə başlayıbsa, bunun günahkarı onların özüdür. Çünki fermer həmin məhsulu aqrotexniki qaydalara əməl etmədən yetişdirib”. 

Bu sözləri Valyuta.az-a iqtisadçı Akif Nəsirli bəzi fermerlərin anbarlarda saxladığı soğanların çürüməsinin səbəbləri haqqında danışarkən deyib.

İqtisadçının sözlərinə görə, soğanın belə xarab olmasının, cücərməsinin səbəbini dəqiqləşdirmək lazımdır:

“Birincisi, sözsüz ki, soğan nə qədər keyfiyyətli olsa da, onu saxlamaq üçün müvafiq tərəvəz anbarı yoxdursa, soğan çürüyəcək, cücərəcək və s. Kisəsi 1-1.50 manata təklif olunan soğanı mən də görmüşəm, kisənin birini alıb bir-bir həmin soğanları kəsərək baxmışam ki, bu soğanlar niyə çürüyür. Soğanların cücərməsi problem deyil. Burda əsas problem odur ki, soğanı normal becərmirlər, yetişdirmirlər. Bu bitki tez və çox böyüsün deyə həddən artıq omoniom şorası veriblər. Buna silitra deyirlər. Belə olanda soğan qaralır, çürüyür. Çünki soğanın tərkibindəki azotun miqdarı 2-3 dəfə çoxdur. Soğanı əkib-becərənlər anlamır  ki, bu maddənin hektara veriləcək norması var. Bir hektara 2-3 dəfə artıq omoniom şorası vermək bitkini daha tez böyüdür, yetişdirir, məhsul bol olur, amma keyfiyyət aşağı olur”. 

Akif Nəsirli deyib ki, soğanın saxlanması üçün isə mürəkkəb texnologiyaya ehtiyac yoxdur:

“Soğan normal keyfiyyətdə anbara daxil olursa, anbarda normal temperatur olursa, həmin məhsul çürüməyəcək. Əvvəllər anbarlarda yox idi, yazda səpilən qış soğanını yığıb quru yerdə və ya evin çardağında saxlayırdılar, nə cücərmirdi, nə də növbəti mövsümə qədər xarab olmurdu. Ona görə də soğanları normal aqrotexniki qaydalara uyğun yetişdirmək və quru yerdə saxlamaq lazımdır. 

Azərbaycanda soğana tələbat var, lakin ölkə daxilində yetişdirlən soğan normalara uyğun deyil, ona görə də əhali Rusiyadan gələn soğanı alır. 

Çünki ölkəyə Rusiyadan gələn soğanı 5-6 ay saxlamaq olur”.

Davud