“İflas etmək üzrə olan biznesə biznes konsultant köməklik edə bilməz” - Təlimçi
Hər hansı bir biznes üçün müəyyən qədər maliyyə sərf olunub, amma bu biznesin işləri yaxşı getmir, uğursuzdur. Bunların içərisində iflas etməyə yaxın olan bizneslər də olur. Bəs uğursuz olan biznesə və iflas etmək üzrə olan biznesə biznes konsultant cəlb etməklə onun işlərini yaxşılaşdırmaq olarmı?
Bu barədə Valyuta.az-a danışan biznes təlimçisi İlham Əfəndiyev bildirib ki, iflas etməkdə olan şirkətə biznes konsultant köməklik edə bilməz:
“Müəyyən problemləri olan şirkətə biznes konsultant köməklik edə bilər. Bunun üçün sahibkar ilə görüş keçirilir. Yəni, konkret problemlər müəyyən olunur, ardınca bu problemləri həll etmək üçün təkliflər hazırlanır. Həmin təkliflər qəbul olunursa, artıq biznes konsultantlar bunu həll etmək üçün çalışır. Problemlərin nə ilə bağlı olması ilkin olaraq sahibkarın, nadir hallarda rəhbərlərin fikirləri əsasında müəyyən olunur. Məsələn, satışların yetəri qədər olmaması, xalis mənfəətin aşağı olması, şirkətin zərərlə işləməsi, şirkətin müştərilərinin sayının yetərincə olmaması və s. kimi problemlərin həll yolunu tapmaq lazımdır.
Adətən, biznes konsultantlar şirkətlərə müəyyən problemi həll etmək üçün cəlb olunurlar. Digər məsələlər də var ki, hansı sahibkar sıfırdan şirkət yaratmaq istəyir, burada düzgün vizyon formalaşdırmaq, düzgün missiya həyata keçirmək, düzgün dəyərlər təsvir etmək üçün biznes konsultant dəvət edə bilir.
Ümumilikdə, biznes plan hazırlamaq, investorları cəlb etmək və s. kimi işlərdə də biznes konusltantlar faydalı ola bilir”.
Təlimçi qeyd edib ki, adətən, biznes konsultantlar şirkətləri üç yerə bölürlər, xidmət göstərən, satışla məşğul olan və istehsalatla məşğul olanlar. Bundan asılı olaraq yanaşma fərqlənir, prioritetlər dəyişir: “Xidmət göstərən şirkətlərdə öndə olan məsələ xidmət səviyyəsidir. Satışla məşğul olan şirkətlərdə satışın düzgün təşkil olunması, satış şəbəkəsinin genişlənməsi və satılan məhsulun hansı şərtlərlə satılması vacibdir. İstehsal şirkətlərində ən vacib məsələ istehsalatın fəallığıdır. Yəni, işçi sayı, avadanlığın keyfiyyəti, kommunal xərclər və s. kimi məsələlərə diqqət yetirmək lazımdır”.
Əvəz Həsənov
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay