Xaricdən gəlir əldə edən şəxslər vergini hansı ölkədə ödəməlidirlər?
Azərbaycanda yaşayan başqa ölkəyə İT xidməti göstərən, bank hesabı da digər ölkədə olan şəxslər vergini hansı ölkəyə ödəməlidirlər?
Valyuta.az bu barədə vergi məsələləri üzrə ekspert Nahid Tağıyevin şərhini təqdim edir:
“Bir şəxsin hansı ölkəyə vergi ödəməli olduğunu müəyyən etmək üçün birinci növbədə təsbit etməliyik ki, həmin şəxs hansı ölkənin rezidentidir. Bunun üçün qanunvericiliyin təsbit etdiyi norma var. Belə ki, qanunvericiliyə əsasən hər hansı bir şəxs təqvim ilində, yəni, 1 yanvar - 31 dekbar aralığında üst-üstə hansı ölkədə 182 gündən artıq müddətdə yaşayırsa, həmin ölkənin rezidenti sayılır.
Daha sadə dillə desək, bir şəxs hansı ölkədə 6 aydan çox yaşayırsa, bu halda, həmin şəxs o ölkənin rezidenti olur və vergini də ora ödəməlidir. Şəxsin harada xidmət göstərməsindən, bank hesabının harada olmasından asılı olmayaraq, Azərbaycanda 6 ay müddətindən artıq yaşadığına görə vergini Azərbaycana ödəməlidir”.
N.Tağıyev bildirir ki, Vergi Məcəlləsinin 127.1 maddəsinin tələbinə əsasən bir şəxs xarici ölkədə vergi ödəyirsə, bu halda, Azərbaycana Respublikasının büdcəsinə ödəməli olduğu vergini hesablayan zaman həmin ölkədə ödədiyi vergi nəzərə alınır: “Məsələn, şəxs Azərbaycana 1000 manat vergi ödəməlidirsə, xarici ölkədə həmin şəxsdən 300 manat vergi tutulubsa, bu halda 1000 manatdan 300 manat çıxılır və dövlət büdcəsinə 700 manat vergi ödəməli olur”.
Əvəz Həsənov
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay