İşçilər deyirlər ki, 10-15 dəqiqə, yaxud yarım saat işə gecikməkdə nə problem var ki? Şirkətlər isə izahat yazdırırlar, maaşdan tuturlar və s. Hər şirkətdə işə gecikməyə yanaşma fərqlidir. Ümumiyyətlə, işçinin işə gecikməsi normaldırmı? İşə gecikmə halına şirkətlər necə reaksiya verməlidirlər?

İdarəetmə üzrə türkiyəli təlimçi Ahmet Kandemir Valyuta.az-a bildirib ki, əgər işçi bir ayın içərisində bir-iki dəfə işə gecikirsə, bu çox normal haldır: “Tıxaca düşə, taksi və ya marşrut gecikə bilər və s. Burada qəti şəkildə izahat alınmamalı, maaşdan tutulmamalıdır. Sadəcə işçiyə xəbərdarlıq etmək lazımdır ki, bu hallar təkrarlanmasın. Bu işçinin ümumi gördüyü işlərə baxmaq lazımdır, gördüyü işlərlə əlaqəli olaraq bu kimi xırda məsələlərdə güzəştə getmək olar. Amma bu davamlı şəkildə olarsa, tədbir görmək lazımdır”.

A.Kandemir deyir ki, izahat yazdırmaq və maaşdan tutmaq kimi tədbir metodları uğurlu olmaya bilər: “Çünki, bir müddət sonra işçi geciksəm belə cəriməsini ödəyəcəm, ya da izahat yazacam deyib, bu kimi halları təkrarlaya bilər. Bu zaman da bu tədbirlər effektli olmaz və şirkət daxilindəki nizam-intizam qaydaları pozulmağa başlayar. Bu tədbirlərin effekti olması üçün tədbirlərin yekununda qərar olması vacibdir. Bir işçi məcburiyyət qarşısında deyil, işə gəlməyin müəyyən qaydası olduğunu bilərək işə gəlməlidir”.

A.Kandemir qeyd edib ki, əgər bir işçidə davamlı olaraq gecikmə halları baş verirsə, şirkət daxili nizam-intizam qaydalarının pozulmaması və işlərə mənfi təsir etməsinin qarşısını almaq məqsədi ilə həmin şəxslərlə əməkdaşlığı dayandırmalıdır: “Amma ayda iki-üç dəfə işə gecikən birinə daha mülayim davranış sərgiləmək olar. İşçinin bu tədbirlərə görə işə gəlməsinin deyil, bu işdə məsuliyyətinin olduğunu bilərək gəlməsi lazımdır”.

Əvəz Həsənov