2023-cü ilin 10 ayı ərzində Azərbaycanın 4,54 milyon ABŞ dolları dəyərində 227 milyon ədəd siqaret (tərkibində tütün olan) idxal edilib. Bu, həcm baxımından 2022-ci ilin müvafiq dövrü ilə müqayisədə 49,3%, dəyər baxımından isə 66,3% çoxdur. Siqaretin idxalının bu qədər artması nə ilə əlaqədardır? Niyə daxili istehsal tələbatı ödəmir? 

Bu barədə Valyuta.az-a danışan iqtisadçı-ekspert Pərviz Heydərov bildirib ki, hər hansı bir məhsulun ölkəyə idxalı artırsa, bu daxili tələbat ilə əlaqədardır və yerli istehsalın daxili tələbatı ödəyə bilməməsi ilə, yerli istehsalın aşağı düşməsi ilə bağlı ola bilər: “Azərbaycana siqaret idxalının genişlənməsi və 60 faizdən çox artması yaxşı tendensiya deyil. Azərbaycanda tütünçülük ənənəvi xarakter daşıyır, sovet dövründə bu sahəyə xüsusi diqqət yetirilirdi. Amma müstəqillik illərində bir sıra sahələr kimi tütünçülük də, təəssüf ki, az qala məhv olmaq təhlükəsi ilə üz-üzə qaldı. Son illər ərzində isə tütünçülüyə xüsusi diqqət yetirilir. Yenidən bu sahədə bərpa meyilləri müşahidə olunur. Eyni zamanda ölkədə siqaret istehsalı ilə məşğul olan müvafiq istehsal sahələri də var və ümumiyyətlə, ölkəmizin keyfiyyətli siqaret ixrac etmək imkanı olduğu halda, idxalın bu qədər genişlənməsi çox mənfi faktor olaraq qəbul edilməlidir”.

P.Heydərov bu qədər idxalın artması yerli tütünçülüyü və yerli siqaret istehsalını tamamilə məhv etmək təhlükəsi ilə üz-üzə qoyur: “Buna ciddi diqqət yetirmək və bu sahəni nəzarətə götürmək vacibdir. Dövlət bir sıra məhsulların o cümlədən, tütün məhsullarının və alkoqollu içkilərin aksiz vergisini demək olar ki, hər il artırmaq siyasəti yeridir. Bu il ərzində də bu istiqamətdə bu il də addım atılıb. Belə bir fonda idxalın da genişlənməsi ciddi təhdiddir və ciddi nəzarət tələb edir”.

Əvəz Həsənov