Onlayn ticarətlə məşğul olanlar hansı vergiləri ödəməlidir?
Sosial mediaların inkişafı ilə onlayn ticarət də vüsət alır. Xüsusilə də, son dönəmlər insanlar vaxtlarına qənaət etmək üçün alış-veriş etmək istəyəndə onlayn mağazalara üz tuturlar. Bu səbəbdən də onlayn mağazalar günü-gündən çoxalır.
Bəs onlayn ticarətlə məşğul olanlar hansı vergiləri ödəməlidir?
Valyuta.az vergi məsələləri üzrə ekspert Nahid Tağıyevin şərhini təqdim edir.
N.Tağıyev deyir ki, əgər siz onlayn ticarətlə məşğulsunuzsa, birinci növbədə təbii ki, vergi ilə bağlı uçotdan keçməli, VÖEN açdırmalısınız: “Bunu fərdi sahibkar və ya hüquqi şəxs formasında edə bilərsiniz. İkinci növbədə siz anbar qismində vergi orqanında obyekt qeydiyyatdan keçirməlisiniz. Bundan sonra siz hansı vergiləri ödəməlisiniz?
Bu sizin dövriyyənizdən asılıdır. Əgər illik dövriyyəniz 200 000 manatı keçmirsə, bu halda siz öz seçiminizdən asılı olaraq, ya sadələşdirilmiş verginin və ya gəlir (mənfəət) vergisinin ödəyicisi olursunuz. Əgər dövriyyəniz 200 000 manatı keçirsə, bu halda əlavə dəyər vergisi ödəyicisi olursunuz. Eyni zamanda gəlir vergisinin də ödəyicisi olursunuz. Bundan başqa, sahibkarlıq fəaliyyəti göstərdiyiniz ərazidən asılı olaraq məcburi dövlət sosial sığorta haqqını ödəyirsiniz. Həmçinin minimum aylıq əmək haqqının 4 faizi həcmində, yəni 13 manat 80 qəpik icbari tibbi sığortanı da ödəməlisiniz”.
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay