2021-ci ilin fevral ayında bankların ayırdığı kreditlərin həcmi 17 milyard 587,2 milyon manata çatıb.

Mərkəzi Bankın hesabatına əsasən, həmin məbləğin 19,7%-i dövlət, 77,7%-i isə özəl bankların payına düşüb. Kreditlərin 2,6%-i isə qeyri-bank kredit təşkilatlarının xətti ilə ayrılıb.

Fevralda bankların ayırdığı kreditlərin böyük hissəsi – 8 milyard 948,4 milyon manatı istehlak kreditlərinə yönəlib. Bu, 2015-ci ildəki göstəriciləri də üstələyib. Həmin ildə baş verən devalvasiyadan sonra Azərbaycanda istehlak kreditlərinin həcmi kəskin azalmağa başlayıb və uzun müddət belə davam edib. Əgər bunun bir səbəbi insanların gəlirlərinin azalması idisə, digər tərəfdən kredit almaq istəyən vətəndaşların imkanlarının məhdudlaşdırılması idi. Başqa sözlə, “qara siyahı”ya düşən şəxslərə banklar birmənalı olaraq “yox” deyir, onlara kredit ayırmaqdan imtina edirlər.

Bununla bağlı fikirlərini İndex.az-la bölüşən millət vəkili Vüqar Bayramov devalvasiya nəticəsində kredit tarixçələri pisləşən vətəndaşlara vəsait ayrılması üçün ikinci şansın verilməsini təklif edib:

“Mərkəzi Banka 2015-ci ildə manatın devalvasiyası nəticəsində ödəniş imkanları pisləşən və nəticədə adları “qara siyahı”ya daxil olan vətəndaşlarımıza yenidən kredit götürmək imkanı yaradılmasını təklif etmişik. Onlar üçün kredit tarixçəsi ilə bağlı amnistiya tətbiq olunsun”.

Pandemiya dövründə Mərkəzi Bank buna uyğun addım atdığını xatırladan V.Bayramov həmin güzəştlərin devalvasiya nəticəsində “qara siyahı”ya düzən şəxslərə də aid edilməsinin zəruri olduğunu vurğulayıb:

“Devalvasiya nəticəsində kredit tarixçəsi pisləşən vətəndaşların “qara siyahı”dan çıxarılmasının həyata keçirilməsi məqsədəuyğun olardı. Çünki bu, həmin şəxslərin yenidən banka müraciət etmək və kredit əldə etmək imkanı deməkdir. Xüsusilə, vətəndaşın özündən asılı olmayan səbəbdən onun ödəmə qabiliyyəti pisləşibsə, imkanları zəifləyibsə, bu halda Mərkəzi Bank tərəfindən güzəştin tətbiq olunması daha mütərəqqi addım olar. Burada söhbət məzənnənin dəyişməsi, qlobal pandemiya kimi faktorlardan gedir”.

Millət vəkili bu konteksdə bankların kredit tarixçəsi pisləşən vətəndaşlara fərdi olaraq yanaşmasına tərəfdar olduğunu deyib. İnsanın özündən asılı olmayan səbəblərdən kredit tarixçəsinin pisləşməsi hallarında güzəştlərin vacibliyini vurğulayıb: “Müraciətlərə ayrılıqda baxılsın. Əgər onun kredit tarixçəsi devalvasiya, pandemiya kimi səbəblərdən pisləşibsə, həmin vətəndaşlarımızın adının “qara siyahı”dan çıxarılması daha məqsədəuyğun olardı”.