"Amazon"un təsisçisi Ceff Bezos "The New York Times"ın təşkil etdiyi "DealBook" sammitində uğura nail olmaq, çətinlikləri dəf etmək və imkanları düzgün dəyərləndirmək haqqında öz fikirlərini bölüşüb.

Valyuta.az xəbər verir ki, Bezos insan təbiətinin riskləri şişirtməyə və imkanları düzgün qiymətləndirməməyə meyilli olduğunu qeyd edib:

"Mənim müşahidələrimdən biri budur ki, ümumilikdə insan təbiəti riskləri olduğundan çox, imkanları isə olduğundan az dəyərləndirir".

O, sahibkarlara bu yanaşmanı dəyişməyi tövsiyə edir. Bezosun fikrincə, əslində risklər düşündüyümüzdən daha kiçik, imkanlar isə gözləniləndən daha böyükdür.

Ceff Bezos bildirib ki, uğurun qarşısını alan əsas səbəb xarici maneələr deyil, insanın öz düşüncə tərzidir. Əgər bir şəxs biznesini böyük bir səviyyəyə qaldıra bilməyəcəyinə inanırsa, demək olar ki, bu biznes kiçik miqyasda qalacaq.

Bezosun sözlərinə görə, insanlar çox vaxt müxtəlif çətinlikləri və riskləri təsəvvür etməkdə ustadırlar:

- maliyyə vəsaitinin çatışmazlığı;
- kadrların azlığı;
- məhsul istehsalı və ya çatdırılmasında çətinliklər.

Ancaq ən böyük maneə, ideyanın böyük bir biznesə çevrilə bilməyəcəyinə dair inamdır. Əgər uğur haqqında təsəvvür yoxdursa, ona nail olmaq ehtimalı da çox azdır.

Bezos vurğulayır ki, geniş düşüncə tərzi uğuru zəmanət vermir. Lakin dar düşüncə demək olar ki, hər zaman uğursuzluğa aparır. Əgər dar düşüncə "özünü doğruldan bir proroqnoz" kimidirsə, geniş düşünmək uğura gedən ilk addımdır.

Bu, sadə, amma güclü bir ideyadır: mümkün olanın sərhədlərini genişləndirin. Risklərə deyil, potensiala diqqət yetirin. Çünki Bezosun dediyi kimi, real imkanlar çox vaxt ilk baxışdan göründüyündən daha böyükdür.

Paşa Məmmədli