ABŞ-lı sahibkar İlon Mask (Elon Musk) sərvəti 400 milyard dollara çatan ilk şəxs olub. 

Valyuta.Az xəbər verir ki, bu barədə "Bloomberg" məlumat yayıb.

"Bloomberg Milyarderlər İndeksi"nə görə, Maskın sərvəti son olaraq özəl mülkiyyətində olan "SpaceX" şirkətinin səhmlərinin satışı nəticəsində artıb. Bu satış onun sərvətini 50 milyard dollar artıraraq 439,2 milyard dollara çatdırıb.

Maskın sərvəti 2022-ci ilin sonlarında əhəmiyyətli dərəcədə, təxminən 200 milyard dollar azalmışdı. Lakin o vaxtdan bəri, xüsusilə son aylarda, sərvəti yenidən bərpa olunub.

Noyabr ayında ABŞ-da Donald Trampın (Donald Trump) prezident seçkilərində qalib gəlməsi də Maskın sərvətinin artımına təsir edib. Seçkilərdən əvvəl "Tesla"nın səhmləri 65% artıb. Bu artımın əsas səbəbi isə pilotsuz avtomobillərə aid qaydaların sadələşdirilməsi və elektrikli nəqliyyat vasitələri üçün vergi güzəştlərinin ləğv ediləcəyi gözləntiləridir. Bu amillər "Tesla"nın rəqiblərinə mənfi təsir edib. Bundan əlavə, Maskın süni intellekt startapı "xAI"nin dəyəri son aylarda iki dəfədən çox artaraq 50 milyard dollara çatıb.

Mask, Tramp administrasiyasında yeni yaradılmış "Dövlət Effektivliyi Departamenti"nin həmsədri kimi əsas rolu üzərinə götürməyə hazırlaşır. Bu, ona Ağ Evə birbaşa çıxış imkanı verəcək.

Həftənin əvvəlində isə "SpaceX" və onun investorları işçilərdən və şirkətin digər daxili iştirakçılarından 1,25 milyard dollarlıq səhmlər almaq qərarına gəlib. Bunun nəticəsində şirkətin qiymətləndirməsi təxminən 350 milyard dollara yüksəlib və "SpaceX" dünyada ən qiymətli özəl startap olaraq tanınıb.

Rəhim