2024-cü ilin yanvar ayında OPEC+ sazişinə qatılan ölkələrin orta gündəlik neft hasilatı 2023-cü ilin dekabr ayı ilə müqayisədə 340 min barel azalaraq sutkada 41,2 milyon barel təşkil edib. 

Valyuta.az xəbər verir ki, bu barədə “Vedomosti” "S&P Global Commodity Insights"ın araşdırma məlumatlarına istinadən yazır.

Bu əhəmiyyətli azalma son 6 ayda maksimum olub. Sənəddə qeyd olunur ki, bu, bir sıra OPEC+ ölkələrinin hasilatın könüllü azaldılması və Liviyada hadisələr fonunda baş verib. Liviyada etirazlara görə hasilat gündəlik 120 min barel azalıb.

Azalmanın böyük hissəsi 12 OPEC ölkəsində baş verib - gündəlik 310 min barel. Kartelə daxil olmayan qalan OPEC+ üzvləri hasilatı gündə cəmi 30 min barel azaldıblar.

Azalmaya baxmayaraq, 18 OPEC+ ölkəsinin ümumi hasilat həcmi sutkada 275 min barel limiti keçib. İraq həddi ən çox - 270 min barellə keçib.

"S&P Global Commodity Insights" hesab edir ki, hasilatın azaldılması digər ölkələrdə hasilatın artması fonunda OPEC+-ın qlobal bazardakı payının daha da azalması anlamına gələ bilər. Ekspertlər bunun OPEC+ daxilində fikir ayrılıqlarına səbəb ola biləcəyini istisna etmirlər.

Paşa Məmmədli