Yeni qaydaya əsasən, xaricdən Türkiyəyə gələn sərnişinlər əlavə gömrük rüsumları ödəsələr belə, artıq bir neçə mobil telefon gətirə bilməyəcəklər. Bu o deməkdir ki, ikinci telefon gömrükdə müsadirə olunacaq və yalnız ölkədən çıxanda sahibinə qaytarılacaq. 

Valyuta.az xəbər verir ki, bu məhdudiyyət 2024-cü ilin oktyabrında qüvvəyə minəcək. Müsadirə edilən telefonlar üç aya qədər gömrük anbarlarında saxlanılacaq.

Eyni zamanda, Türkiyə hökuməti ölkəyə idxal edilən cihazların xidmət müddətini 120 gündən 180 günə qədər uzadıb. Bu müddət bitdikdən sonra yerli operatorlar xarici telefonun GSM modulunu qara siyahıya salacaq və o, mobil şəbəkəyə qoşula bilməyəcək. Belə smartfonun kilidini açmaq yalnız gömrük rüsumlarını ödədikdən sonra mümkün olacaq.

Türkiyənin nəqliyyat və infrastruktur naziri Əbdülkadir Uraloğlu əcnəbilərə ölkədə telefonlarını 120 gün əvəzinə 180 gün istifadə etməsinə icazə verəcək tənzimləmənin 2024-cü il martın 1-dən qüvvəyə mindiyini bildirib.

Bu tədbirlər qaçaqmalçılıq və elektronikanın qanunsuz dövriyyəsi ilə mübarizəyə yönəlib. Sərnişinlərdən yeni qaydalara diqqət etmələri və səfərlərini buna uyğun planlaşdırmaları xahiş olunur.

Paşa Məmmədli