Amerika məhkəməsi “Novatek” şirkətinin İdarə Heyətinin keçmiş sədr müavini Mark Citveyi gəlirləri gizlətmək sxemini həyata keçirməkdə və ABŞ Daxili Gəlirlər Xidmətinə saxta sənədlər təqdim etməkdə ittiham edərək 7 il həbs cəzasına məhkum edib. 

Valyut.az xəbər verir ki, bu barədə Amerika Ədliyyə Nazirliyinin saytında bildirlib.

Məhkəmə bildirib ki, 2005-ci ildən 2015-ci ilə qədər Citvey əhəmiyyətli ofşor aktivlərinə sahiblik və nəzarəti gizlədib, vergi bəyannamələrini təqdim etməyib və milyonlarla dollar gəlirdən vergi ödəməyib.

Mark Citvey 1995-ci ildən Rusiyada işləyib, 2003-cü ildə “Novatek”in Direktorlar Şurasının üzvü seçilib, 2010-cu ildən isə şirkətin idarə heyətinin sədr müavini olub. 2019-cu ildə Citvey Rusiya vətəndaşlığı alıb.

Citvey 2021-ci ilin sentyabrında ABŞ-ın Florida ştatında həbs edilib. Buna səbəb onun ofşordakı aktivləri və gəlirləri barədə məlumatları gizlətməsi, həmçinin vergi ödəməkdən yayınması olub. Həbs olunduğu zaman onun İsveçrədəki iki bank hesabında 93 milyon dollardan çox pul olub. Bundan başqa, Citvey Rusiya vətəndaşı olan həyat yoldaşını pulun faktiki sahibi edib.

Citvey həbsdən çıxdıqdan sonra 3 il ABŞ hüquq-mühafizə orqanlarının nəzarətində olacaq, 350 min dollar cərimələnəcək və dövlətə 4 milyon dollar məbləğində kompensasiya ödəyəcək.

Nicat