Dünyada və Azərbaycanda bir çox yeni biznes sahələri yaranır. Bəziləri gəlirli olsa da, bəziləri isə o qədər də gəlir əldə edə bilmir. Bəs Azərbaycanda hansı sahələrdə biznes qurmaq gəlirli olar? Hazırda hansı biznes formaları daha məşhurdur? 

Bu barədə Valyuta.az-a danışan "Mediamark" Digital Agentliyinin təsisçisi Orxan Rzayev bildirib ki, Azərbaycanda sahəsindən asılı olmayaraq e-ticarət platformaları və veb-saytlar üzərindən olan satışlar artır. Bunun əsas səbəblərindən biri "Trendyol" platformasından alış-verişin Azərbaycanda daha geniş yayılmasıdır: "İnsanlar artıq onlayn sifarişlər, kart məlumatlarının daxil edilməsi, çatdırılma ünvanının daxil edilməsi, promokodlardan istifadə etmək və s. kimi vərdişlərə yiyələniblər. Bu səbəblərdən ölkəmizdə onlayn ticarətin həcmi daha da artacaq. Hansı şirkətlərin onlayn ticarət platforması yoxdursa, bunun üzərində işləməlidirlər. Çin atalar sözündə deyilir ki, ağac əkmək üçün ən yaxşı vaxt 20 il öncə idi, ikinci ən yaxşı vaxt bu gündür. Hansı şirkətlər 3 il, 5 il, 7 il öncə onlayn ticarət vebsaytlarını yaradıblar, satışları artırmaq onlar üçün daha rahat olacaq. Hansı şirkətlərin ki, e-ticarət platformaları yoxdur, elə bu gündən onu yaratmaq haqda işləməlidirlər. Gəliri artırmağın əsas yolu o biznesi sürətli böyüdə bilməkdir. Bunun da ən yaxşı yollarından biri onlayn satışlardır. Çünki, onlayn formada satışları daha sürətli böyütmək olur".

O. Rzayev həmçinin bildirib ki, indi elə dövrdə yaşayırıq ki, Bakıda və ya ölkənin istənilən nöqtəsində oturan bir şəxs öz xidmətlərini və ya məhsullarını dünyanın müxtəlif nöqtələrinə sata bilir: "Hazırda dünyada əyləncə sektoru kifayət qədər gəlirli sahə sayılır. Oyun sənayesində fantastik pullar dövr edir. Dropshipping və dropservicing də çox məşhur və gəlirli sahələrdən biridir. Turizm sektorunda gəlirli sahələr kifayət qədərdir. Turizmlə bağlı həm ənənəvi istiqamətdə, həm də rəqəmsal istiqamətdə olan bizneslər, startaplar gəlirli ola bilir. Bu sadaladığımız istiqamətdə olan biznesləri istənilən yerdə yaşamaqla qurub, dünyaya satmaq olur".

Əvəz Həsənov