Aptek səhiyyə sisteminin əsas sahələrindən biri hesab olunur. Apteklərə tələb də çoxdur. Ona görə, bu sahə həm də biznes adamlarının marağındadır. Bəs aptek açmaq istəyənlər nələri bilməlidirlər? Həqiqətən də kənardan göründüyü qədər gəlirli sahədirmi?

Səhiyyə mütəxəssisi Rəşid Tağıbəyli Valyuta.az-a aptek açmaq üçün iş adamlarının nələri bilməli olduğundan danışdı. O, deyir ki, apteki tibbi savadı olanlar açsa, daha yaxşı olar: “Aptek spesifik sahədir, insanların sağlamlığı ilə birbaşa əlaqəlidir. Ona görə, yaxşı olar ki, aptek açacaq şəxsin tibbi savadı olsun. Çünki sadəcə yaxşı qazanc var deyə açdığınız apteklə insanların səhhətinə zərər vura bilərsiniz”.

R.Tağıbəyli deyir ki, aptek açmaq üçün sizə lisenziya almaq və bəzi vacib sənədlər lazımdır: “Çıxarış və texniki pasportu qaydasında olmalıdır, çünki rəsmi qaydada qeydiyyata düşmək üçün həmin sənədlər şərtdir. Lisenziya üçün Asan Xidmətdə lisenziyalar bölməsinə müraciət etməlisiniz. Onlar sizə aptek açmaq üçün lazım olan sənədlərin siyahısını təqdim edirlər. O siyahı əsasında müəyyənləşdirirsiniz ki, nələr sizə uyğundur, nələr yox. Vergi məsələlərini dəqiqləşdirirsiniz”.

Mütəxəssisin sözlərinə görə, aptekin yerləşdiyi məkan bu biznes üçün önəm daşıyır: “Aptekin minimum 60 kvadratmetr olmağı əsas şərtdir. Aptekin yerini çox yaxşı seçmək lazımdır.

Xəstəxana yaxınlığı daha uğurlu seçim hesab olunur. Hələ qarşısında avtomobil parkinqi üçün şərait də varsa, bu da yaxşıdır. Yaşayışın sıx olduğu ərazidə olmağı üstünlükdür. Məhəllə içi apteklər rahat işləmir və qazanc da əldə etmək mümkün deyil. Aptek yerdən ən çoxu bir-iki pilləkən yuxarıda olmalıdır, çünki yaşlı vətəndaş da aptekə gəlir. Nə qədər çox hündür olsa, bir o qədər də, əlçatımlılıq aşağı olacaq. Aptekin içərisinin rəngləri çox qarışıq olmamalıdır. Satış bölməsi girişə daha yaxın olmalıdır”.

Mütəxəssis aptekdə vacib olan detallardan söhbət açdı: “Aptekdə sarğı otağı, mətbəx və dərman otağı, hər biri ayrı olmalıdır. Kamera, yanğın təhlükəsizlik sistemi ilə tam təchiz olunmalıdır. İşıqlandırılması yaxşı olmalıdır, tavanının bir az hündür olması, çöldən görünmə səviyyəsinin aydın olması aptek üçün müsbətdir”. 

Bəs aptek açmaq üçün nə qədər maliyyə olmalıdır? Rəşid bəy deyir ki, aptek açmaq üçün 100 min manat olsa, kifayət edər: “Standart dərmanların aptekə daxil olması, normal şəkildə aptekin satışını və dövriyyəsini təşkil etmək üçün o qiymət hələ ki, kifayət edir. Əgər aptek açmaq sizin üçün uzun məsələdirsə, apteki hazır biznes kimi satan şəxslərdən ala bilərsiniz”.

Qazanca gəldikdə isə mütəxəssis bildirdi: “Qazanc təbii ki, həmişə yaxşı olur. Amma bu aptekin ümumi yerindən, aylıq icarəsindən, gəlirin, xərcin çox olması, əsasən hansı dərmanların satılmasından asılıdır. Sadə, sıradan dərmanlar satılırsa, gözlənti də az olacaq”.

Nuray