İsveç avtomobil istehsalçısı "Volvo" özünün ilk istehsalata hazır sürücüsüz yük maşınını təqdim edib. Maşın avtopilot texnologiyalarının yaradılmasında ixtisaslaşan Amerikanın "Aurora" şirkəti ilə əməkdaşlıqda hazırlanıb. 

Valyuta.az xəbər verir ki, bu barədə avtomobil istehsalçısının materiallarına istinadən "The Verge" məlumat yayıb.

Yeni model "Volvo VNL" uzun məsafəli modelinə əsaslanır və sürücünün müdaxiləsi olmadan 4-cü səviyyə avtonom idarəetməni təmin edən çoxsaylı kameralar və sensorlarla təchiz olunub. Avtomobilin sürücüsüz versiyası xüsusi olaraq "Aurora" avtopilot sistemi üçün hazırlanıb.

Modelin kütləvi istehsala başlaması şirkətlərə pilotsuz nəqliyyat vasitələrinin inkişafına qoyulan sərmayələri geri qaytarmağa kömək edəcək. Yeni avtomobillər "Volvo" şirkətinin dünyada ən böyük zavodu olan ABŞ-dakı Dublin zavodunda istehsal olunacaq.

Bu il "Aurora" 20-yə yaxın tam sürücüsüz avtomobil buraxmağı planlaşdırır və 2025-ci ilə qədər onların sayı 100-ə çatmalıdır.

Paşa Məmmədli