Son dövrlər məhsuldarlığın daha da artması, ziyanvericilərə qarşı mübarizə aparmaq üçün əkin sahələri kimyəvi dərmanlamaya məruz qalır. Bu dərmanlama isə həmin torpaq sahələrinin çirklənməsinə səbəb olur. 

Bəzi ekspertlər düşünür ki, bu torpaqlardan ikinci dəfə istifadə təhlükəlidir, həmin torpaqlar təkrar istifadəyə yaramır. 

Bəs bu dərmanlamanın daha az təhlükəli olması üçün nə etmək olar?

Kənd təsərrüfatı üzrə ekspert Vahid Məhərrəmov deyir ki, torpaqların üç cür dərmanlama üsulu var: bioloji, kimyəvi, texniki:

“Bu dərmanlama üsullarından da ən yaxşısı bioloji dərmanlamadır. Bu zaman torpaq daha az ziyan görür”. 

Pestisidlərdən istifadə haqqında da danışan Vahid Məhərrəmov deyib ki, normaya uyğun pestisidlərdən istifadə etmək olar:

“Pestisidlərdən lazım olmadığı halda istifadə etmək ümumiyyətlə düzgün deyil. Bəziləri çalışır ki, əvvəldən tədbirləri həyata keçirsin. Düşünürəm ki, kifayət qədər fərqli vasitələr var xəstəliklərə, zərərvericilərə qarşı tədbir həyata keçirmək üçün. Bunlardan ən uğurlusu isə bioloji vasitələrlə dərmanlamadır. Son vaxtlar dünyada daha geniş yayılıb. Bu pestisidlər zəhərdir. Mikroorqanizmləri, canlıları zəhərləyərək məhv edir. Torpaqda da faydalı mikroorqanizmlər var. Bu mikroorqanizmlər də torpaqların münbitləşdirilməsində böyük rol oynayır. Bitkilərin mineral maddələrlə təminatında rolları çox böyükdür. Bitkinin qidaya olan ehtiyaclarının bir hissəsini ödəyirlər. Apardığımız müşahidələrə görə, Azərbaycanda bu zəhərli maddələrdən çox istifadə olunur. Ölkəyə gətirilən pestisidlərin keyfiyyəti aşağı olduğu kimi, fermerlər bu maddələri bir neçə dəfə tətbiq etməyə çalışırlar. Çox istifadə olunanda da, torpaqda olan lazımlı mikroorqanizmlərə ziyan vurur, məhvinə gətirib çıxarır”. 

“Pestisidlər istifadə olunan torpaqlarda ikinci dəfə təkrar əkin işləri aparıla bilər, yoxsa bu torpaqlar həmin maddələrdən təmizlənməlidir” sualına cavab olaraq Vahid Məhərrəmov bildirib ki, hər şey hansı şəraitdə, nə qədər və harda istifadə olunmasından asılıdır:

“Qapalı, istixana şəraitində istehsalla məşğul olunur, bu maddələrdən aşırı dərəcədə istifadə edilirsə, torpaq təzələnməli, zəhərli torpaq çıxarılmalıdır. Bəzən həmin şəxslər bu torpaqları aparıb başqa ərazilərə atır, orda çayları, digər torpaq sahələrini çirkləndirirlər. Buna ciddi nəzarət olunmalıdır”.

Davud