Kibertəhlükəsizlik şirkəti "Tenable Holdings"in baş icraçı direktoru və idarə heyətinin sədri Amit Yoran (Amit Yoran), xərçəng xəstəliyi ilə mübarizədən sonra cümə günü vəfat edib. 

Valyuta.Az xəbər verir ki, bu barədə "Tenable" şirkəti məlumat yayıb.

“Amit yalnız gələcəyə baxan bir lider deyil, həm də sənayemizə, şirkətimizə, mədəniyyətimizə və icmamıza dərin təsir göstərmiş bir rəhbər qüvvə idi,” – deyə "Tenable" şirkətinin insan resursları və mədəniyyət üzrə baş direktoru Bridcett Paradise (Bridgett Paradise) şənbə günü əməkdaşlara göndərdiyi mesajda bildirib.  

Şirkətin məlumatına görə, Yoran dekabrın 5-də tibbi məzuniyyətə çıxmışdı. O, 2016-cı ildən şirkətin baş icraçı direktoru kimi fəaliyyət göstərir və 2018-ci ildə şirkəti birjada listinqə daxil etmişdi.  

Merilend ştatında yerləşən "Tenable" şirkətinə qoşulmazdan əvvəl Yoran "RSA Security" şirkətində prezident vəzifəsində çalışıb və təhdidlərin aşkar edilməsi və cavablandırılması platforması olan "NetWitness"i təsis edib. 1998-ci ildə isə o, Virciniya ştatında yerləşən "Riptech Inc." şirkətini təsis edərək hökumət və korporativ kompüterlərin hücumlardan qorunması üçün sensor şəbəkələrindən istifadə etməyə başlamışdı.  

2003-cü ildə Yoran yenicə yaradılmış Daxili Təhlükəsizlik Departamentinin Milli Kibertəhlükəsizlik Diviziyasının direktoru təyin edilmiş, lakin bir il sonra bu vəzifədən istefa vermişdi.  

Yoran tez-tez kabel televiziyalarında müsahibələr verir, kibertəhlükəsizlik və məlumatların toplanması mövzularında çıxış edirdi. 2023-cü ilin mart ayında "CNN" kanalında ABŞ hökumətinin "TikTok" platformasının məlumat toplama ilə bağlı narahatlıqlara görə qadağan edilməsi ehtimalı haqqında müsahibə vermişdi.  

"Tenable" şirkətinin müstəqil direktorlar şurasının sədri Art Koviello (Art Coviello) bildirib: “Onun kibertəhlükəsizlik sahəsinə olan ehtirası, strateji baxışı və ətrafındakıları ruhlandırmaq bacarığı "Tenable"ın mədəniyyətini və missiyasını formalaşdırıb. Onun mirası bizə gələcəkdə yol göstərəcək.”  

Yoranın məzuniyyəti dövründə "Tenable Holdings" şirkətinin idarə heyəti maliyyə direktoru Stiv Vintz (Steve Vintz) və əməliyyat direktoru Mark Turmondu (Mark Thurmond) müvəqqəti icraçı direktorlar təyin etmişdi. Şirkət bildirib ki, Vintz və Turmond daimi baş icraçı direktorun axtarışı müddətində şirkətə rəhbərlik etməyə davam edəcək.  

Rəhim