Hər hansı bir səbəb olmadan vergi orqanı vergi ödəyicisinin obyektinə, fəaliyyət göstərdiyi əraziyə gedib, yoxlama həyata keçirə bilərmi?

Valyuta.az bu barədə vergi məsələləri üzrə ekspert Nahid Tağıyevin şərhini təqdim edir:

“Qeyd edək ki, Vergi Məcəlləsində yerlərə getməklə həyata keçirilən yoxlamanın iki növü təsbit edilib: səyyar vergi yoxlaması və operativ vergi nəzarəti tədbiri. Operativ vergi nəzarəti tədbiri ilə bağlı qeyd edim ki, Vergi Məcəlləsinin 50.2-ci maddəsində bu tədbirin həyata keçirilməsinin əsasları var. Yəni, vergi orqanı hər hansı səbəb olmadan operativ vergi nəzarəti tədbiri həyata keçirə bilməz. Başqa sözlə desək, operativ vergi nəzarəti həyata keçirilməsi ilə bağlı qərarda 50.2-ci maddədə göstərilən əsaslar mütləq qaydada öz əksini tapmalıdır. 

İkinci yoxlama növü olan səyyar vergi yoxlaması da iki yerə bölünür: Növbəti və növbədənkanar vergi yoxlaması. Növbəti səyyar vergi yoxlamasında vergi orqanı hər hansı səbəb olmadan yoxlama həyata keçirə bilər. Növbədənkanar səyyar vergi yoxlaması həyata keçirmək üçün vergi orqanı mütləq Vergi Məcəlləsinin 38.3-cü maddəsində nəzərdə tutulan əsaslardan birinə malik olmalıdır. 

Ümumi şəkildə desək, vergi orqanı növbədənkənar səyyar vergi yoxlaması və operativ vergi nəzarəti tədbiri zamanı mütləq Vergi Məcəlləsinin 50.2-ci və 38.3-cü maddəsində göstərilən əsaslardan birinə sahib olmalıdır. Növbəti səyyar vergi yoxlamasındə isə hər hansı bir səbəb olmadan vergi orqanı yoxlama tədbirləri həyata keçirə bilər”.

Əvəz Həsənov