Səyahət etmək həm ruhu dincəldən, həm də yeni təcrübələr qazandıran bir fəaliyyətdir. Lakin ilk dəfə səyahət edənlər üçün bu proses bir qədər çətin ola bilər. Yəni planlaşdırma zamanı edilən kiçik səhvlər səyahət xərclərinin artmasına və narahatlıqlara səbəb ola bilər. Səyahəti rahat və qənaətli etmək üçün nələrə diqqət etmək lazımdır?

Bloger, turizm eksperti Azər İsmayıl Valyuta.az-a açıqlamasında bildirdi ki, ilk dəfə səyahət edənlərin xərclərinin çox olması onların təcrübəsizliyi ilə əlaqəlidir: “Çünki ilk dəfə səyahət edən şəxs büdcəsini düzgün planlaşdıra bilmir. Məsələn, otel və nəqliyyat təcrübəsi kifayət qədər olmadığı üçün şəhər daxilində ictimai nəqliyyatdan istifadə etmək əvəzinə taksiyə üstünlük verir. Eyni zamanda, hava limanından şəhərə getmək üçün də taksi seçir. Bundan əlavə, ucuz olsun deyə şəhər mərkəzindən uzaq bir otel seçir, lakin hər gün şəhərə gəlib-getmək üçün sərf etdiyi nəqliyyat xərcləri daha çox olur. Digər bir səbəb isə, hoteldə qalmaqla bağlı müəyyən stereotiplərinin olmasıdır. Gənc bir şəxs hosteldə qalmaq əvəzinə otel seçirsə, bu da xərclərin artmasına səbəb olur”.

A.İsmayılovun sözlərinə görə, ilk olaraq yaxın ölkələrə səyahət edib təcrübə qazanmaq lazımdır: “Hər bir işdə təcrübə önəmlidir. İlk dəfə səyahət edənlərə tövsiyə edərdim ki, yaxın ölkələrə səyahət etsinlər. Bu ölkələrin mədəniyyəti və mətbəxi haqqında müəyyən məlumatları olarsa, bu, onların səyahətini asanlaşdırar. Bundan əlavə, qrup turlarına qatılmaq da yaxşı seçimdir. Hazırda müxtəlif şirkətlər və səyahət blogerləri qrup turları təklif edir. İlk dəfə səyahət edənlər bu turlardan istifadə etsələr, planlaşdırma və digər qayğılarla məşğul olmaq məcburiyyətində qalmazlar, çünki bütün təşkilati məsələləri qrup rəhbəri həll edir. Bu yolla daha aşağı xərclə səyahəti başa vura bilərlər”.

Ekspert bildirdi ki, əgər ilk səyahətlərə tək gedirsinizsə, xərclərinizi düzgün planlamaq istəyirsinizsə, 2-3 ay öncədən səyahətlə bağlı hər bir şeyi planlamağa başlamalısınız: “İlk növbədə qalacağı yer haqqında məlumat toplamaq vacibdir. Əgər oteldə qalacaqsa, son 3-6 ayda həmin otel və ya hostel haqqında yazılmış rəylərə nəzər salmaq lazımdır. Beləliklə, qaldığı yerin necə olduğunu təxmin edə bilər. Otaq rezervini 2-3 ay əvvəlcədən etmək tövsiyə olunur. Yeni il və ya digər xüsusi tarixlərdə isə qiymətlər daha yüksək olduğundan, rezervi daha erkən etmək məqsədəuyğundur. Təhlükəsizlik məsələlərinə gəldikdə, hosteldə qalarkən diqqətli olmaq lazımdır. Çünki hostellər ictimai yerlərdir və şəxsi əşyaları etibarlı şəkildə saxlamaq üçün lokerlərdən istifadə etmək olar. Daha təhlükəsiz olmaq üçün özünüzlə qıfıl götürmək məsləhətdir. Ümumilikdə, hostellərin təsnifatını nəzərə alaraq daha rahat bir seçim edə bilərsiniz”.

Maya Hüseynova