"Netflix" canlı idman yayını sahəsinə yatırımlar edərək geniş izləyici auditoriyası qazanmağı qarşısına məqsəd qoyub. Lakin bu strategiya abunəlik qiymətlərinin artmasına səbəb ola bilər.

Valyuta.az xəbər verir ki, son dövrdə "Netflix"in strategiyasında böyük dəyişikliklər diqqət çəkir. Şirkət tanınmış boksçular - Mayk Tayson və Ceyk Pol arasındakı döyüş, eləcə də Milad günü yayımlanan NFL oyunları kimi böyük idman tədbirlərinə sərmayə qoyub.

NFL oyunları və izləyici potensialı

Xüsusilə NFL oyunları ilə bağlı qeyd etmək lazımdır ki, "Netflix" ABŞ-da yayımlanan iki oyun vasitəsilə orta hesabla 24 milyon izləyiciyə çatıb. Bu rəqəm ABC, "Fox" və CBS kanallarının keçən ilki Milad yayımlarının nəticələrindən az olsa da, böyük bir potensialın mövcudluğunu göstərir.

UBS analitiklərinin fikrincə, izləyici sayı gözlənilən qədər olmasa da, "Netflix"in gələcəkdə daha çox idman yayımı hüquqları əldə edərək böyük imkanlar yaradacağına inanırıq. Bu, reklam gəlirlərini artırmaqla yanaşı, abunə qiymətlərinin artması ilə də nəticələnə bilər.

"Netflix" 2022-ci ildən bəri ABŞ-da abunəlik qiymətlərini artırmayıb. Lakin canlı idman yayımı şirkətə əhəmiyyətli bir təkan verir. Məsələn, məlumat axını araşdırma şirkəti "Antenna"nın hesablamalarına görə, Tayson-Pol döyüşü "Netflix"ə cəmi üç gün ərzində 1,43 milyon yeni abunə gətirib.

Canlı idman və yüksək interaktivlik

Canlı idman tədbirlərinin Netflix"ə belə təkan verməsinin bir neçə əsas səbəbi var. İdman tədbirlərinin real vaxtda yayımlanması izləyiciləri daha yüksək səviyyədə cəlb edir və onlarla canlı qarşılıqlı əlaqə yaradır. Bu, izləyicilərin hadisələri izləməklə yanaşı, dərhal paylaşmalarına və müzakirə etmələrinə imkan verir. Bu cür qarşılıqlı əlaqə Netflix üçün əhəmiyyətli bir üstünlükdür.

İdman hüquqları və gələcək gözləntilər

"Netflix" idman yayım hüquqlarını əldə etməklə məzmun kitabxanasını genişləndirə və həm mövcud, həm də yeni abunəçilərə müraciət edə bilər. Bununla belə, bu hüquqların əldə edilməsi ucuz başa gəlmir. Analitiklər hesab edir ki, bu investisiyalar nəticə etibarilə abunəçilər üçün daha yüksək qiymətlərə çevrilə bilər.

"Netflix"in rəsmisi Ted Sarandosun UBS Media və Kommunikasiya konfransında qeyd etdiyi kimi, abunə qiymətlərinin artırılması abunəçilərin əldə etdiyi dəyərin artırılması ilə əlaqələndirilir. Bu isə o deməkdir ki, şirkət canlı idman yayımlarını həm gəlir artırmaq, həm də izləyiciləri daha çox cəlb etmək üçün əsas vasitələrdən biri kimi görür.

Canlı idman yayımı "Netflix"in rəqabət üstünlüyünü artıran əsas amil olmaqla yanaşı, yaxın gələcəkdə abunəlik qiymətlərində dəyişikliklərə yol açacağı ehtimalını da gücləndirir.

Paşa Məmmədli