"Panasonic Energy"nin əsas məqsədi: Çindən idxalı dayandırmaq

"Panasonic Energy" şirkəti ABŞ-da istehsal edilən elektrikli nəqliyyat vasitələri üçün batareyaların tədarük zəncirində Çindən asılılığı aradan qaldırmağı planlaşdırır.

Valyuta.Az xəbər verir ki, şirkətin yüksək səviyyəli rəhbərinin açıqlamasına əsasən, bu dəyişiklik "bir nömrəli məqsəd" kimi qiymətləndirilir.

Şimali Amerika "Panasonic Energy"nin prezidenti Allan Svan (Allan Swan), bu qərarın Donald Trampın prezident olduğu dövrdə Çindən idxal edilən məhsullara tətbiq edilən gömrük vergilərinin artırılması təklifindən qaynaqlandığını bildirib. Svanın sözlərinə görə, şirkətin bu tariflərə uyğunlaşmaq üçün atmalı olduğu ilk addım "tədarük zəncirini Çindən ayırmaq" olacaq.

Qeyd edək ki, "Tesla" və digər avtomobil istehsalçılarına batareya tədarük edən "Panasonic Energy", Yaponiyanın elektronika nəhəngi olan "Panasonic"in bölməsidir. Şirkət ABŞ-da Nevada ştatında bir zavod idarə edir və bu il Kanzas ştatında ikinci fabrikin açılmasını planlaşdırır.

Rəhim