Çinin "Galactic Energy" kosmik startapı "Ceres-1" raketini buraxarkən ilk uğursuzluğunu yaşayıb. 

Valyuta.az xəbər verir ki, "Changguang Satellite Technology" şirkətinin "Jilin-1 Gaofen-04B" uzaqdan zondlama peyki sentyabrın 21-də Jiuquan Peyk Başlatma Mərkəzindən buraxılıb. Lakin "Galactic Energy"nin rəsmi "WeChat" səhifəsindəki yazıya görə, missiya plana uyğun getməyib.

“Raket planlaşdırıldığı kimi uçmadı və buraxılış missiyası uğursuz oldu. Uğursuzluğun səbəbləri müəyyən ediləcək və təhlil olunacaq", deyə "Galactic Energy" bildirib.

"Ceres-1" dördmərhələli, 19 metr hündürlüyündə, 400 kq-a qədər faydalı yükləri aşağı Yer orbitinə (LEO) çıxara bilən raketdir. Cihaz 2020-ci ilin noyabrında təqdim edilib. Son insidentdən əvvəl "Ceres-1" 9 qəzasız uçuşu tamamlamışdı.

"Galactic Energy" həmçinin LEO-ya beş tona qədər faydalı yük çatdıra biləcək daha böyük "Pallas-1" raketini hazırlayır.

"Galactic Energy" raketinin uğursuz buraxılması bu il Çinin bütün aerokosmik sənayesi üçün ilk uğursuzluq olub. 2023-cü ildə Çin ardıcıl 43 uğurlu uçuş həyata keçirib.

Paşa Məmmədli